Алматы қаласының әкімі Бақытжан Сағынтаев алматылық Ажар Әбдірешеваның күйеуінің өліміне қатысты істі жеке бақылауына алды. Бұл туралы әкім facebook парақшасында жазды.
Алматылық Ажар Әбдірешева қала әкімі Бақытжан Сағынтаевқа Instagram-да видеоүндеу жасаған. Оның айтуынша, күйеуінің өліміне әкімдіктің бұрынғы қызметкері, бас бухгалтердің жүргізушісі кінәлі болуы мүмкін.
– Құрметті Бақытжан Сағынтаев! Бүгін менің күйеуім Кенже Байниязовты өлтіріп кеткеніне 7 күн өтті. Қала әкімдігі өз қызметкерінің кісі өлтіруге қатысы бар-жоғына байланысты ешқандай түсініктеме бермеді. Керісінше, кісі өлтіруші Сұлтан Үметалиевтің кері датамен, яғни 2021 жылдың 18 ақпанында жұмыстан шығарылғаны туралы естіп-біліп жатырмын. Қала әкімдігі, нақтырақ айтқанда, әкімдіктің бас бухгалтері кісі өлтірген жеке жүргізушісінің қылмысқа қатыстылығын жасыру үшін қолдан келгеннің бәрін жасап жатыр, – деді ол.
Жәбірленушінің сөзінше, қазіргі уақытта күдіктінің қаруы табылмаған. Алматы әкімдігіне тиесілі автокөлік қылмыс болған жерде тұрған. Кісі өлтіруші қылмыс орнына қызметтік автокөлікпен барған.
– Бұл – 22 ақпандағы жағдай бойынша ер адам сол күнде де әкімдік қызметкері болғанының дәлелі, – деді ол.
Марқұмның жұбайы Сұлтан Үметалиевке психикалық жағдайына байланысты анықтама істетіп жатқаны туралы ақпарат естігенін айтты.
– Алматылық Ажар Әбдірешеваның өтінішімен оның жұбайын өлтіру дерегі бойынша істі жеке бақылауыма алдым. Күдікті қамауға алынды. Қалалық Полиция департаментінің басшысы Қ.Таймерденовке тергеудің жан-жақтылығы мен объективтілігін қамтамасыз етуді тапсырдым. Марқұмның отбасы мен жақындарына көңіл айтамын, – деп жазды әкім.
Посмотреть эту публикацию в Instagram
