Астанада 24 жастағы ер адам Министрліктер үйінің кіреберістерінің бірінде өрт қоюға әрекет жасаған.
Әлеуметтік желілерде өрт қою әрекетінен кейінгі жағдайдың видеосы пайда болды. Шабуыл жасаған адам кіреберістегі турникетке жанғыш қоспаны лақтырған.
"Белгісіз ер адам ғимаратқа кіріп, жанғыш қоспаны турникетке лақтырған. Салдарынан шамамен 2 шаршы метр аумақта өрт шықты. Құтқарушылардың үйлесімді іс-қимылдарының арқасында өрт сөндіргіштің көмегімен толығымен жойылды", - дейді Астана қалалық төтенше жағдайлар департаменті.
Оқиға кезінде ешкім зардап шекпеді.
"Министрліктер үйінің кіреберісін өртеп жіберген 24 жастағы азаматты анықтап, ұстады. Қазіргі уақытта сотқа дейінгі тергеу басталды. Болған оқиғаның барлық жағдайлары анықталатын болады", - дейді қалалық полиция департаментінің баспасөз қызметі.
