АҚШ президенті Дональд Трамп пен Қытай төрағасы Си Цзиньпин соңғы айларда бәсеңси бастаған екіжақты қатынастарды қайта жандандыруға түрткі болған кең ауқымды телефон әңгімесін өткізді. Тараптар Тайвань, сауда, Украинадағы соғыс және есірткі трафигі сияқты маңызды мәселелерді талқылады.
Телефондағы сөйлесуден кейін Трамп АҚШ пен Қытай арасындағы қарым-қатынасты «өте керемет» деп атап, екі көшбасшы бір-біріне шақыру жібергенін айтты. Ол Си Цзиньпиннің шақыруын қабылдап, сәуір айында Қытайға баруды жоспарлап отырғанын, ал Қытай басшысы жылдың соңында АҚШ-қа келетінін мәлімдеді.
Трамп әңгіме барысында Украинадағы соғыс, фентанил саудасы және америкалық фермерлер үшін жасалатын келісім жайлы сөйлескенін айтты. «Біз енді үлкен мәселелерге назар аудара аламыз… Жиі байланыста болу маңызды екенін екеуміз де түсінеміз», — деді ол.
Қытай Сыртқы істер министрлігінің хабарлауынша, Трамп Вашингтон Тайвань мәселесінің Қытай үшін маңызын «жақсы түсінетінін» атап өткен. АҚШ Тайваньды тәуелсіз мемлекет ретінде ресми танымаса да, оның басты серіктесі әрі қару жеткізушісі болып саналады.
Си Цзиньпин әңгіме кезінде Тайваньның Қытайға қайтарылуын «соғыстан кейінгі халықаралық тәртіптің ажырамас бөлігі» деп сипаттады. Бұл мәлімдеме Жапония мен Қытай арасындағы Тайваньға қатысты шиеленіс күшейген кезде жасалды. Жапония премьер-министрі Санаэ Такаичи кез келген шабуыл жағдайында Жапония Тайваньды әскери қолдауы мүмкін екенін айтқан.
Әңгіме АҚШ-тың Украинадағы соғысты тоқтатуға бағытталған жаңа дипломатиялық бастамасымен де тұспа-тұс келді. Қытай бұл қақтығыста өзін бейтарап тарап ретінде ұстап отыр. Си Цзиньпин барлық бітімге бастайтын әрекеттерді қолдайтынын және дағдарыстың түпкілікті шешілуін қалайтынын мәлімдеді.
Телефон қоңырауы екі көшбасшының өткен айда Оңтүстік Кореяның Пусан қаласында кездескенінен кейін болды. Сол кездегі уақытша келісімге сәйкес, Қытай маңызды минералдар экспортына шектеулерді бір жылға тоқтатып, АҚШ кейбір қытайлық тауарларға салынған тарифтерді азайтуға келіскен. Сонымен қатар, Қытай бірнеше ай бойы сатып алудан бас тартқан америкалық соя бұршағын қайта импорттауға уағдаласқан.
Трамп дүйсенбі күні Симен «фентанил, соя және басқа да ауылшаруашылық өнімдері» жөнінде сөйлескенін жазды. «Біз фермерлеріміз үшін өте маңызды келісім жасадық — әрі ол алдағы уақытта одан сайын жақсара түседі», — деді АҚШ президенті, бірақ нақты егжей-тегжейін жарияламады.
