Кездесуге Президент Әкімшілігі басшылығының, Ақпарат және коммуникациялар министрлігі мен басқа да мемлекеттік органдардың өкілдері қатысты. Бұл туралы Ақорданың баспасөз қызметі хабарлады.

Кездесу барысында еліміздің мемлекеттік бұқаралық ақпарат құралдарының басшылары Елбасыға өздері басқарып отырған ұйымның қызметі туралы баяндады.

Қазақстан Президенті сондай-ақ мемлекеттік БАҚ-тардың жетістіктерімен және даму жоспарларымен танысты. Мемлекет басшысы жастарға адамгершілік тәрбие беруге ықпал ететін сапалы отандық медиаконтент әзірлеудің маңыздылығын атап өтті.

– Мемлекеттік бұқаралық ақпарат құралдары медиа нарықта өз орнын иеленуі  үшін жұмыс істеуі керек. Қызықты және ақпаратты контенттің, соның ішінде әлемдік мәдениет және тарих туралы контенттің көбірек болғаны қажет, – деді Нұрсұлтан Назарбаев.

Отандық БАҚ басшылары Мемлекет басшысына Қазақстанның ақпарат кеңістігіндегі қазіргі ахуал мен оның даму келешегі туралы айтты.

Соңында Қазақстан Президенті бәсекеге қабілетті мемлекеттік бұқаралық ақпарат құралдарын қалыптастыру қажеттігін атай отырып, бірқатар нақты тапсырма берді.