... (Сенат депутаттарын сайлаудың қарсаңында)

«Болыс болдым мінеки

Бар малымды шығындап

Түйеде қом, атта жал,

Қалмады елге тығындап». АБАЙ.

Әкім болдым мінеки

Бар байлықты шығындап.

Доллар, теңге қалмады

Жоғарыға тығындап.

Екі-үш жылдай отырсам,

Қайтарам-ғой «сығымдап».

Біріншісі- әмәнда,

Ауыстырдым команда.

Әр орынға кемінде

Жүз мың доллар жаман ба?

Екіншісі-жер саттым,

Пайдасы көп маған да,

Пайдасы көп «оған да».

Кеткенімді толтырам

Бірер жылда осылай,

Пара, «сыйлық» аламда.

Ұлықтарым сөз айтса,

Момақанмын мөлиген.

Зәре-құтым қашады

Қорыққандай өлімнен.

Қара халық сөз айтса

Тыңдамаймын «пысқырмай».

Арызы мен сындарын,

Жүре берем «қыстырмай».

«Көк үйден» келсе «көкелер»

Мақтауымды асырам.

«Былық» пенен « шылықты»

Білдіртпеймін жасырам.

Баға кетті шарықтап,

Қылмыс деген көбейді,

Жұмысы жоқ аш халық,

Ұрлық қылмай не жейді?..

Есеп берем өтірік,

Халқым менің «қарық» деп.

«Киімі көк,қарны тоқ»,

Көшелері жарық деп.

Алла-құдай жар болса,

Астанада «крышам»,

Аман- есен бар болса,

Әбден байып алған соң,

«Қойны-қоншым» толған соң,

Парламентке барамын,

Айлығыма бұйырса,

Бір миллион аламын.

Бір де ұйықтап, бір де ояу,

«Артты қысып» отырам.

«Қалаулы» боп халқыма,

Депутат боп «қатырам»!

Аймұханбет Бейсембеков