Өмір
Мұң керек деді,
Мен түннен ұрладым.
Өмір
Күлкі керек деді,
Мен күннен ұрладым.
Өмір
Сән керек деді,
Мен гүлден ұрладым.
Өмір
Ән керек деді,
Мен желден ұрладым.
Өмір
Үміт боп келді,
Мен таңды атырдым.
Өмір
Күдік боп келді,
Мен тұңғиықта жатырмын.
Өмір
Кеңейтіп еді,
Мен көлге құладым.
Өмір
Тарылтып еді,
Мен шөлге құладым.
Өмір
Бар болып келді,
Мен байлықтан өлдім.
Өмір
Жоқ болып келді,
Мен кедейлік көрдім.
Өмір
Мәңгілікпін деді,
Мен жүздім, су іштім.
Өлім
Жанды үгіттеді,
Мен үміт үздім, у іштім.
Өмір
Түлкі боп кетті,
Мен тазы боп шалдым.
Өмір
Не деген епті,
Мен разы боп қалдым.
Жел ымдады,
Жапырақтар сөйлейді.
Мен тыңдадым,
Өмір
Тағы не дейді?!.
Авторы: Гүлмира Сүйекенова
