Президент Қасым-Жомарт Тоқаев жаңа құрамдағы мәжіліс депутаттарына табыс тілеп, алдағы уақытта қарқынды жұмыс істеуді тапсырды.

– Құрметті депутаттар! Баршаңызды сайлаудың аяқталуымен құттықтаймын және жаңа құрамдағы мәжіліс депутаттарына табыс тілеймін. Өткен шақырылымның депутаттарына ойдағыдай қызмет атқарғаны үшін ризашылығымды білдіремін, – деді ол.

Тоқаевтың айтуынша, соңғы 5 жылға жуық уақытта парламент қабырғасында 410 заң қабылданған. Депутаттар өздерінің заңға бастамашылық ету құқығын толық пайдаланып, 60-қа жуық заң жобасын дайындаған.

– Бұл осыған дейінгі 5-ші шақырылым депутаттарының бастамаларын қоса алғаннан да көп. Жаңа депутаттар алдыңғы әріптестерінің осы қарқынын сақтай отырып, анағұрлым қарқынды жұмыс істеуі қажет. Себебі бәрімізді зор міндеттер мен ауқымды істер күтіп отыр, – деді Қасым-Жомарт Тоқаев.