Әскерде жараланған сарбаз Ербаян Мұхтар емделу үшін Ыстанбулға ұшып кетті. Бұл туралы адвокат Инга Иманбай өзінің фейсбук парақшасында хабарлады.
"Ербаян емнің екінші кезеңі – толыққанды реабилитациядан өту үшін таңғы бесте Стамбулға ұшып кетті. Қасында анасы мен әкесі бар. Бұл сапар Ербаян үшін шешуші кезең. Сол себепті барлығымыз бірге баламызға ақ жол, сәтті сапар тілейік. Соңғы бір жылда Ербаян тек ата-анасының емес, бүкіл халықтың ұлына айналды. Оның жағдайы ешкімді бей-жай қалдырмады. Бірінші кезеңдегі операция мен ем халықтың қолдауымен жасалса, бұл жолы мемлекет тарапынан үлкен көмек көрсетілді: портал арқылы үш айға созылатын қымбат әрі маңызды реабилитациялық ем толық қаржыландырылды. Ал ұшуды Ішкі істер және Қорғаныс министрліктері бірлесіп ұйымдастырды", деп жазды Инга Иманбай.
Адвокат Ербаянның Ыстанбулға ушуы үшін Ішкі істер министрлігі мен Қорғаныс министрлігі көмектескенін айтты.
"Осы ретте Ербаянның ата-анасының атынан Денсаулық сақтау министрі Ақмарал Әлназарова ханымға, генерал Қайрат Үмбетов мырзаға алғыс білдіреміз. Ербаянға қатысты «не істеп жатырсыз?» деп маған жиі сұрақ қоясыздар. Жауапты көп сөзбен емес, осындай нақты нәтижелермен бергім келеді. Халықтың назарын аударту, мемлекеттік органдарды іске жұмылдыру, осындай маңызды емді ұйымдастыру – бір күннің шаруасы емес. Бұл ұзақ келіссөздер мен табанды еңбектің жемісі. Айқайсыз, бірақ жүйелі жасалған жұмыс", дейді Инга Иманбай.
Оның сөзінше, алдағы үш айда Ербаянның денсаулығы бақылауда болады.
