Жамбыл облысында сот қос азаматтық үшін айыппұл тағайындады, деп хабарлады облыстық баспасөз қызметі. Тұрар Рысқұлов аудандық соты ҚР азаматтық туралы заңнамасын бұзу бойынша істі қарады.
"2025 жылдың сәуір айында аудан полициясы ер адамның Ресей Федерациясының азаматтығын және төлқұжатын алғанын анықтады. Алайда ол Қазақстан Республикасының заңнамасында белгіленген мерзімдерде шетел азаматтығын алу фактісі туралы тиісті органдарға хабарламаған", - деп жазылған хабарламада.
Сот отырысында ер адам өз кінәсін мойындап, Ресей азаматтығын қабылдау кезінде оған Қазақстан Республикасының төлқұжатын және жеке куәлігін тапсыру қажеттілігі туралы хабарланбағанын түсіндірді.
Мұндай заңбұзушылық үшін 100 АЕК мөлшерінде айыппұл салу немесе Қазақстан аумағынан әкімшілік жолмен шығарып жіберу қарастырылған.
Сот қаулысымен ер адам кінәлі деп танылып, оған 393 мың теңге мөлшерінде айыппұл салынды.
Қаулы заңды күшіне енді.
