Кешелі бері ел назары Алматы облысы Жамбыл ауданы жаққа ауды. Осы ауданның орталығы Ұзынағаш кентіне ШҚО-дан мал әкеп сатпақ болған үш бірдей азамат өткен жексенбіде екі жүк көлігіне тиелген 40 бас ірі қара малымен жоғалды. Туыстары дабыл қағып, бір аптаға жуық уақытқа созылған іздеу жұмыстарына полициядан бөлек, жоғалған жігіттердің туыстары, достары, еріктілер де жұмылдырылды.

Өкінішке орай, бүгін полиция жоғалған үш жігіттің де қаза болғанын, қылмысқа қатысы бар деген күдікпен екі азаматтың тұтқындалғанын хабарлады. Оның өзін полиция басшылығы марқұмдардың туыстарына ғана айтқан.

Жалпы осы бір апта уақыт ішінде не Жамбыл аудандық, не Алматы облыстық ІІД тарапынан ақпарат құралдарына, осы оқиғаға алаңдаушылық білдірген жалпы жұртшылыққа ресми түсініктеме берген жан болмады. «Қамшы», Baq.kz бастаған бірнеше ақпараттық сайт, 31-арна, КТК телеарналарының журналистері ресми мәліметті кімнен аларын білмей дал болды. Бұл жағдай мемлекеттік ұйымдардың қоғамдық резонанс туғызған оқиғаларға қатысты шұғыл ақпараттық жұмыс жүргізуге қабілетсіз екенін көрсетіп отыр.

Сонымен өткен жексенбіде жоғалған үш азаматтың қаза болғанын білдік. Тергеу жүріп жатыр екен. Екі күдікті тұтқындалыпты. Оған қатысты да осы оқиғаның басы-қасында жүрген азаматтардың күдігі көп сияқты. Сондықтан да, полиция, басқа да мемлекеттік органдар елді құлақтандыру, теріс ақпараттардың таралуына тосқауыл болу жайын ойлауы керек.

Енді негізгі мәселеге көшсек, бұл жағдай тек бір ауданның не облыстың шеңберінде қалатын оқиға емес. Зардап шегуші тараптың атамекенге келген қандастарымыз екенін ескерсек, бұл оқиға қоғамда әлеуметтік әділдік тұрғысынан белгілі бір деңгейде теріс көзқарас туғызуы мүмкін. Оның үстіне, үш азамат мал әкелген Ұзынағаш базарында алаяқтық пен бопсалау сынды қылмыстар бұған дейін де болғанын, тіпті, базарды кісі тонауды кәсіпке айналдырған топтар да жоқ еместігін айтып жүргендер бар. Сондықтан да, бірнеше ақпарат құралында жарияланған осы оқиғаға қатысты облыс басшысы Амандық Ғаббасұлы да ел алдына шығып, көпке басу айтуы, тиісті мекемелердің жұмысын қатаң бақылауға алуы керек сияқты.