Алматы облысының Қарасай ауданындағы  Шамалған ауылында  Қазақстан республикасының Тұңғыш Президенті – Ұлт Көшбасшысының «Атамекен» тарихи-мәдени орталығы ашылды.

Алматы облысына қарасты Қарасай ауданындағы Шамалған ауылында Қазақстан Республикасының Тұңғыш Президенті – Ұлт Көшбасшысының «Атамекен» тарихи-мәдени орталығы ашылды. Шараның салтанатты ашылуында Тұңғыш президент қоры орталықтың экпонаттар қорына Мемлекет басшысы пайдаланған үкіметтік авто көлігін сыйға тартты. Елбасының туған жерінде құрылған орталықтың мақсаты – қазақстандықтар арасында Елбасының шығармашылық және саяси жолын кеңінен тарату, сондай-ақ Президенттің өмірі мен қызметінің айшықты үлгілері негізінде жастардың патриоттық тәрбиесін күшейту.

Шамалған – Елбасының кіндік қаны тамған ауыл. Әлем назарындағы Қазақстанның Тұңғыш Президенті Үшқоңыр тауының етегіндегі осы бір етек-жеңі жинақы елді мекеннен түлеп ұшқан еді. Бұл ауылда Мемлекет басшысының тағылымды өмір жолын өскелең ұрпаққа паш ететін тарихи-өлкетану мұражайы 1998 жылдан бері келушілерге қызмет етіп келеді. Ал Тұңғыш Президент күні мерекесіне орай есігін айқара ашқан «Атамекен» тарихи-мәдени орталығы шамалғандықтар ғана емес, тұтас еліміздің мақтанышына айналатын рухани кешенге айналмақ.
Мерекелік күнге орайластырылған салтанатты жиынға ҚР Президенті кеңсесінің басшысы Махмұд Қасымбеков, облыс әкімі Амандық Баталов, қоғам қайраткері, меценат Болат Әбішұлы арнайы келіп, қарасайлықтардың қуанышын бірге бөлісті. Алғашқы құттықтау сөзінде астанадан келген мейман Махмұд Базарқұлұлы әлем таныған елеулі мемлекет қалыптастыра білген Ұлт көшбасшысының даналығы мен даралығына тоқталып, осындай танымал тұлға өмірге келген өлкенің қадір-қасиетін тілге тиек етіп, орталықтың ерекше рухани ордаға айналуына тілектестігін білдірді. Алматы облысының әкімі Амандық Ғаббасұлы баршаны Тұңғыш Президент күнімен құттықтап, «Туған жер» бағдарламасы аясында есігін айқара ашып тұрған бұл кешен халықтың Елбасына деген ыстық ықыласының айқын көрінісі екенін алға тартып, тілеулес, ниеттес болған жандардың барлығына ризашылығын білдірді. «Баршаңызды Қазақстан Республикасының Тұңғыш Президенті күнімен шын жүректен құттықтаймын!
Бүгін осынау Қазақстан Республикасының Тұңғыш Президенті – Ұлт Көшбасшысының туған жерінде «Атамекен» тарихи-мәдени орталығының салтанатты ашылу рәсімінде баршамыз Елбасымыздың Тәуелсіздік жылдарында Қазақстан халқының кемелді келешегі үшін атқарған ерен еңбегі үшін алғысымызды білдіреміз. Орталықтың алтын қорына жиналған барлық экспонаттар Елбасының балалық шағынан егемен елдің Көшбасшысына айналған осы күндерге дейінгі жүріп өткен сара жолынан сыр шертеді. Менің ойымша, бұл орталықтың өскелең ұрпақты отансүйгіштікке тәрбиелеуде олардың санасын жаңғыртуда өзіндік елеулі үлесі болары сөзсіз. Бүгін тұсауы кесіліп отырған осы орталықтың барша қазақстандықтардың тарапынан сөзсіз мойындалған Ұлт Көшбасшысымен жақындастыратын орталыққа айналарына сенімдімін», – деді өңір басшысы А.Баталов. Құттықтауынан кейін облыс басшысы бүгінгі айтулы шараға мұрындық болған тарихи-мәдени орталықтың ашылуына өзінің өлшеусіз үлесін қосқан барша азаматтарға Құрмет грамоталары мен Алғыс хаттарын табыстады.
Марапатталғандар арасында «Заман-Ту» ЖШС директоры Шәміл Қожаханов, «Қазкоммерцбанк» АҚ директорлар кеңесінің төрағасы Кеңес Рақышев, «Дәулет Серпін» ЖШС директорының міндетін атқарушы Жалғасхан Дәлібаев, құрметті зейнеттік демалысқа шыққан Қарасай батырдың «Шапағат» мектеп музейінің меңгерушісі Рымкеш Шайкенқызы мен Күләш Әміровалар бар.
«Атамекен» тарихи-мәдени орталығының директоры Жәмилә Елгандиеваға қызметтік автокөліктің кілтін табыс етті. Өз кезегінде барлық жетісулықтар атынан облыстық ардагерлер ұйымының төрағасы Ермек Келімсейіт өскелең ұрпақ үшін маңызы зор игі іс үшін жомарт жандарға алғысын айтса, жастар атынан ортаға шақырылғанУшинский орта мектебінің оқушысы Дархан Шавхатов Елбасына арнаған өлеңін ел алдында тебірене оқып берді.
ҚР Тұңғыш Президенті – Елбасы қорының атқарушы директоры Қанат Жұмабаев бүгінгі ашылып отырған орталықтың келешек ұрпақ үшін тарихи мән-маңызға ие екендігін ерекше атап өтті. Қ.Жұмабаев ерекше сый ретінде орталыққа Мемлекет басшысының 2001 жылы мінген қызметтік автокөлігін тарту етті. Ол өзінің құттықтау сөзінде: «Біз бүгін тарихи мәні бар үлкен оқиғаға куә болып отырмыз. Бұл күн барлық қазақстандықтар үшін елеулі күн, өйткені Елбасы Нұрсұлтан Әбішұлы Назарбаев – қарқынды әлеуметтік-экономикалық және саяси дамуы бар мемлекеттің бірегей үлгісін жасаған заманымыздың танымал мемлекеттік және саяси қайраткері. Елбасы секілді тарихи тұлға – біздің жастарымыз теңелуге тырысып, өздері үшін дұрыс бағдар белгілеуінің, еліктеуінің айшықты үлгісі, ал оның идеялары мен еңбегінің жемісі халық игілігіне айналуға тиіс», – деді.
Жиналған көпшілік ғимарат ішіне еніп, мәдени-тарихи мекенді қызыға аралап көрді.
Ғимараттың салтанатты түрде лентасын қию рәсіміне мәртебелі меймандармен бірге Болат Назарбаев та қатысты. Осылайша, Тұңғыш Президент – Ұлт Көшбасшысының «Атамекен» тарихи-мәдени орталығының өз жұмысын бастауына жол ашылды. Шараға қатысушылар мен қонақтар көпшілік назарына қойылған бірегей экопзициялармен танысу мүмкіндігіне ие болды.
«Атамекен» тарихи-мәдени орталығында ҚР Тұңғыш Президенті – Елбасының қоры мен кітапханасы, Тұңғыш Президенттің музейі, Президент іс басқармасы, ҚР Ұлттық кітапханасы, Шамалған ауылының мектеп-музейі, Қарасай аудандық тарихи-өлкетану музейі және М. Тынышпаев атындағы Алматы облыстық тарихи-өлкетану музейі берген құжаттар, кітаптар, фотоматериалдар және басқа да экспонаттар жиналған.
Жаңа орталықта экспонаттар Н.Ә.Назарбаевтың өмірі мен қызметінің, Қазақстан Республикасының қалыптасуы мен дамуының негізгі кезеңдеріне сәйкес хронологиялық ретпен орналастырылған. Орталыққа келушілерге қазақстандық мемлекеттіліктің қайта жаңғыруы процесіндегі, экономикадағы және әлеуеметтік саладағы, тарихи дамудағы түбегейлі терең өзгерістерді өткерудегі және Қазақстанның ХХ және ХХІ ғасырлар шеңберінде халықаралық беделінің нығаюындағы Елбасының ауқымды үлесін, рөлі мен еңбегін көзбе-көз бағалау мүмкіндігін тудырады.
Бірінші залда болашақ Мемлекет басшысының балалық және жасөспірім жылдарына, еңбек жолының басталуына арналған экспозиция орналасқан.
Екінші залдың экспонаттары Елбасының одақтық республика басшысы қызметтерін атқарған және тәуелсіз Қазақстанның бүкіл халқы Тұңғыш Президент етіп сайлаған кезеңдерге жатады.
«Атамекен» орталығының үшінші залы Елбасының басшылығымен іске асырылған ауқымды қайта құруларға, Қазақстан Республикасы Тәуелсіздігінің ширек ғасырындағы даму қорытындыларына арналған. Сондай-ақ мұнда Н.Ә.Назарбаевтың туған ауылы Шамалғанға әр жылдары барған сәттері туралы фотоматериалдар да бар.
Төртінші залда Елбасының сыртқы саясаттық қызметі – Астанада өткізілген саммиттер және ЭКСПО-2017 көрмесін қоса алғандағы ірі халықаралық шаралар, Қазақтардың Бүкіләлемдік құрылтайы, шетелдердің мемлекет және үкімет басшыларының ресми келген сапарлары туралы материалдар орналастырылған.
Елбасына шетелдік көшбасшылар тарту еткен хаттамалық сыйлықтар келушілердің үлкен қызығушылығын тудырды. «Атамекен» орталығында Президент еңбектерінің, сондай-ақ түрлі авторлар жазған Елбасының жолы туралы кітаптардың үлкен топтамасы жинақталған.
Естеріңізге салар болсақ, ҚР Тұңғыш Президенті – Елбасы Н.Ә.Назарбаевтың «Атамекен» тарихи-мәдени орталығы Алматы облысының әкімдігі және ҚР Тұңғыш Президенті – Елбасы қорының қолдауымен ашылды. Жалпы көлемі 35000 шаршы метрді алып тұрған аумақтағы сәлеті мен дәулеті келіскен зәулім ғимарат жергілікті жұртшылықтың сұранысымен ел азаматтарының демеушілігімен салынған.