«Өрлеу» біліктілікті арттыру ұлттық орталығы» АҚ-ның филиалы Алматы қаласы бойынша педагогикалық қызмет­керлердің біліктілігін арттыру институ­тында, «Өрлеудің» 2018–2022 жылдарға арналған «Туған жер. Туған ел. Туған глобал» республикалық жобасы аясында «Үштілділік – ұлттық сананы қалыптастыру және рухани жаңғыру» атты пән мұға­лімдеріне арналған республикалық «дөңгелек үстел» болып өтті. 

Білім беру ұйымдарында үштілділікті енгізу мәселелері бойынша сындарлы проблемаларды талқылау және тәжірибе алмасу мақсатында ұйымдастырылған онлайн режиміндегі іс-шараға жалпы орта білім беру ұйымдарының басшылары мен пән мұғалімдері, «Өрлеу» БАҰО» АҚ филиал­дарының директорлары, ПҚ БАИ кафедра­ларының оқытушылары және бөлім қыз­меткерлері, Алматы қалалық Білім бас­қармасының өкілдері қатысты.

Жиналғандар алдында сөз алған «Өр­леу» БАҰО» АҚ филиалы Алматы қаласы бойынша ПҚ БАИ директоры, п.ғ.д. Р.Сад­уа­қасова бұл жиынның өзектілігіне, бірлескен шешімдерді іздестіру қажет­тілігіне, мұғалімнің кәсіби құзыреттілігін жетіл­дірудің маңыз­дылығына тоқталды.

«Дөңгелек үстел» басында химия, био­логия, физика пәндерін ағылшын тілінде оқытуды енгізу, сондай-ақ, оқыту қазақ тілді емес мектептерде «Қазақстан тарихы» пәнін қазақ тілінде және қазақ тілінде оқытатын мектептерде «Дүние  жүзі тарихын» орыс тілінде оқыту тәжірибесі талқыланды.

Алматы қалалық Білім басқармасының жалпы орта білім беру бөлімінің бас маманы Қарлығаш Әбдіманапова Алма­тыда 8-сынып оқушыларының ағылшын тілінде жараты­лыстану-математикалық пәндерді игеруі бойынша 27 пилоттық мектеп жұмыс істеуді бастап кеткеніне тоқталды. Ал О.Жандосов атындағы №105 гимназия директоры Әлия Сандықбаева педагогикалық ұжымның көптілді білім беруді дамыту жағдайындағы менеджмент және мониторинг ерекшеліктері туралы айтты. №34 гимназия директоры Зәуреш Бейсембаева үштілді білім беруді енгізу жағдайында семинарлар, коучингтер арқылы мұғалімнің кәсіби құзыреттілігін жетілдірудің қыр-сырымен бөлісті.