Бүгін Алматы көшесіне Мұстай Кәрімнің есімі берілді деп жазады Qamshy.kz ақпарат агенттігі Қазақстан Республикасының Ресей Федерациясындағы елшілігінің баспасөз қызметінің дерегін негізге алып.  Салтанатты шараға ҚР Ресей Федерациясындағы төтенше және өкілетті елшісі Иманғали Тасмағамбетов, Алматы қаласының әкімі Бақытжан Сағынтаев, ҚР Мәдениет және спорт министрі Ақтоты Райымқұлова және башқұрт делегациясын бастаған Мұстай Кәрім атындағы қордың құрылтайшысы, ақынның немересі Темірболат Кәрім қатысты.

Сонымен қатар, «Мамыр-1» шағынауданында орналасқан көшенің ашылу салтанатына қала тұрғындары, қазақстандық және ресейлік ақын-жазушылар, этномәдени бірлестіктер, жастар ұйымдары және Мұстай Кәрімнің туыстары жиналды.

— Бүкіл түрік дүниесінің ұлы шайыры, бауырлас башқұрт халқының ақыны, жазушы-драматург Мұстай Сәфиұлы Кәрімнің есімі қаламыздағы ең бір көрнекті көшеге беріліп отыр, - деп сөз бастады Алматы әкімі, — Төрткүл дүниеге есімі кеңінен танымал Мұстай Кәрімді біздің қазақ оқырманы өз ақыным, төл перзентім деп біледі. Ақынның «Үш таған», «Талтүс» атты кітаптары қазақ тіліне аударылған. Еліміздің қалың оқырманы Мұстай Кәрімді төл ақынындай құрметтеп, оның жалынды жырларын жатқа оқиды.

Мәдениет министрі Ақтоты Райымқұлова айтқандай, «сұм соғысты да бастан кешкен Мұстай Кәрім қолынан ақ қағаз бен қаламды бір тастаған емес».

— Ол ауыр жарақат алып, госпитальдан сауығып шыққан соң, майданның алғы шебіне оралып, өз шығармалары арқылы жауынгерлерге рух беріп отырды. Біз үшін Мұстай Кәрім осындай ізгі де қастерлі қасиеттерімен есте қалады. Оның ұмытылмас тылсым туындыларын жыр сүйер қауым ғасырлар бойы жадында қалатыны сөзсіз, - деді министр.

Айта кетелік, Ресейдің К.С. Станиславский атындағы Мемлекеттік сыйлығының, Башқұртстан Мемлекеттік сыйлығының, КСРО Мемлекеттік сыйлығының лауреаты, Социалистік Еңбек Ері Мұстай Кәрімнің биыл 100-жылдығы кеңінен тойлануда.