Екеуміз бір жылдың төлі едік. Әбекең 1955 жылы 5-ақпанда, мен 9-маусымда туыл­ғанбыз. Алғашқы таныстығымыз 1983 жылдан басталды. Айқын-Ақпаратқа сілтеме жасай Қамшы порталы хабарлайды.

 Сол жылы үш ай­-дай Жаңақорған қонысында «Сельхоз­хи­мия» мекемесінде қатар еңбек еттік. Мен көп ұзамай аудандық «Коммунизм жолы», қазіргі «Жаңақорған тынысы» газетіне қыз­метке ауысып кеттім. Аманжол Кенжебе­-ков Жамбыл гидромелиоративтік-құры­-лыс институтын инженер-механик маман­дығы бойынша бітірді. Оның «ПМК-34» мекемесіндегі теміржонушылық еңбек жолы наряд жазушыға, техника қауіпсіз­ді­гін сақтау және еңбекті қорғау инженер­лі­гіне, «Облвторчерметтің» аудандық уәкіл­дігіне, жоғарыда айтылған «Сельхозхимия» бірлестігінде аға инженерлікке жалғасты. Аманжол Аманбекұлымен тым жақын жол­дас болып кетпегенімізбен, қара­па­йым­ды­лығымыздан, мінезіміздің үйлес­кен­ді­гі­нен болар, тәп-тәуір сыйластық. Оның кі­ші­пе­йіл­дігі, бауырмалдығы бәрімізге ұнай­тын. Өтірік-өсектен аулақ жүретіндерді іш тар­тып, күлімсірей қарайтын. 
1986-1991 жылдары аудан орталығынан шалғай орналасқан «КПСС ХХIV сьезі» атындағы кеңшарда бас инженер, 1991-1994-те аудандық агроөндірістік бірлесті­гінде бас инженер-механик, мемлекеттік бақылау инспекторы, 1994-1996 жылдары «Задарья» кеңшарында техника жөндеу шеберханасының меңгерушісі, 1996-98 жыл­дары «Номе Тұрсынбай-қалпе» қазақ-ауған біріккен мекемесінде бас инженер, 1998-2002 жылдары «Тәуекел-Иса» шаруа қожалығында механик, 2003-2006-да Жо­лаушылар тасымалдау мекемесінде инже­нер, 2006-2012 жылдар аралығында КДС «Қыранда» инженер, 2012-жылдан маз­мұнды ғұмырының соңғы сәттеріне дейін «Жаңақорған-Транзитте» бақылаушы-ме­ханик қызметтерін абыройлы атқарды.
Біз білетін Әбекең өзіне сеніп тапсы­рыл­ған қай жұмыстың да үдесінен шықты. Әкесі Аманбек Кенжебекұлы қағілез, ақ­жар­қын жан еді. Ағайынның ортақ мүд­де­сіне жанашырлықпен қарап, етене ара­ласты. Жаңақорған кентіндегі имандылық үйі – Ислам діні тұрақты насихатталатын қасиетті де киелі орынға айналған орталық мешіт құрылысын жүргізуде Әбекең – Аманбек аға айрықша белсенділік танытты.
Аманжол ата-анасы Аманбек ағамыз бен Батыр ана Бибіхан жеңгеміздің көргенді ұлы болып өсті. Бірақ Аманжолдың өмірі қамшының сабындай қысқа болды. Ол аға жасы алпыстан енді асқан шағында мәң­гі­лік мекеніне аттанды. Өмір сабақтастығын жалғастыратын алтын асықтай 4 ұл-қызы мен сүйікті жары Мәриям барда марқұм­ның шаңырағының оты өшпейді, түтіні түзу ұша береді. 
Жаназаға жер қайысар ел жиналғаны­ның өзі – Кенжебековтердің алыс-жақын за­мандастары мен туған-туыстары, құда-жек­­жат, жора-жолдас, таныс-біліс ара­сындағы беделі биік екендігінің айғағы. Баға жетпес татулығымен көпке өнеге болған Аманбек пен Әбілқасымның перзенттері­нің аға-іні ретіндегі араларынан қыл өтпес шынайы жақындықтарына көпшілік дән риза болып, шын сүйсінеді, қызыға да құ­марта қарайды. 
2007 жылдың мамыр айында дүниеден өткен Аманбек пен 1982 жылдың қаза­нында өмірден озған жұбайы Бибіханнан 10 ұл-қыз өрбіді. Аманкүл-Мәжит, Аман­жол-Мәриям, Әпикүл, Әшіркүл-Әбіләз, Дариха-Серік, Ұлтуған-Әнуар, Бақытбек-Зағипа, Алтынбек-Оразкүл, Жеңісбек-Гүлназ, Жарқынбек – Күнім. Олардың бәрі бір-бір үйдің тұтқасы, замана көшінен қа­лып қоймай өмірден өз орындарын тапқан. Аманбек ағаның перзенттері де ата-ана сеніміне лайық мақсат биігінен көрінуде. 
Аманжол Кенжебеков 1977 жылы ақ­-пан айында Мәриям Исақызы Тұрсы­ма­товамен отау құрып, содан бергі 38 жыл ішінде әке мен ана қызығын бірге бөлісті. Ұстанған ізгі мұраттары оларды әрдайым алға жетеледі. Отбасы қуанышынан артық не бар бұл дүниеде?! Екеуі тума-туыс, құда-жекжат, құрбы-құрдас, дос-жарандары ал­дында жүздері жарқын болды. Бір-бірін қабақтарынан түсінді, үйлерінде дастар­қаны жиылмай, қонақтарын тәңіріндей күт­ті. Кен­жекбектен өрген өзге ұрпақтар секілді, бұлар да ешнәрседен кенде болған емес. Үл­кен-кіші алдында ізеттерінен жа­ңылмай, Аманжол қайырымы мол ұл, Мә­риям иба­лы келін атанды. 
1979 жылы Дана атты тұңғыш перзент­терін сүйді. Өсіп-өнудің басы еді бұл. Бү­гінде Астана қаласында бухгалтер болып қызмет істейтін Дана мен Рахматулладан Нұргүл, Айсұлу, Нұрислам, инженер-меха­ник Қайратбек пен жеке кәсіпкер Әйге­рімнен Аружан, Дінмұхаммед, Инабат, Ал­матыда тұратын мұғалима Ағила мен сот орындаушысы Бақытжаннан Сұлтан, Әзия­да, Қазына, компьютер динайзері Ду­латбек пен мұғалима Алмадан Нұрәли, Бибінұр деген немерелері жас құрақтай жел­пілдеп, қызғалдақтай құлпырып, шат­тыққа кенел­ген шаңырақтың мәні мен сәні­не айналуда. Олар Аманжол құр­дасым­ның атына қы­лаудай кір келтірмеуді көз­дейді, кімнің ұлы, кімнің қызы, кімнің не­мерелері дегенде, Аман­жолдай абзал аза­матты ардақ тұтып, ақ жолын әспеттеп, өр­кенді істерін алға апа­руды өздеріне мақ­таныш санайды. 
Мәриямның мамандығы – бухгалтер. Аудандық тұтынушылар одағында, Жа­ңақорған жұмысшылар кооперациясын­да жемісті еңбек етті. Отағасының қыз­мет бабымен «КПСС-XXIV сьезі» атындағы кеңшарға қоныс аударғанда, сол елді ме­кенде дүкен меңгерушісі болып, тұрғын­дардың ілтипатына бөленді. Жұмыстан қол үзбей жүріп, сүйіп қосылған жолдасының көңілінен шықты. Бала тәрбиесімен айна­лысуға да уақыт тауып, оларды тиянақты білім алуға, тапсырылған істе тындырым­дылық танытуға баулыды.
Әрбір ата-ана үшін ұл-қыздарына, не­ме­ре-шөберелеріне тәрбиеші әрі қамқор­-шы болу парыз. Ағайынды Әбекеңдер – Аманбек пен Әбілқасым осы тұрғыдағы бо­рыштарына адал болды, бұлжытпай орындады десек, қателесе қоймаспыз.
Тектілік дарыған Кенжебековтер әулеті­нен тараған әр ұрпақ ана құдіретін терең тү­сінеді. Олардың әкелеріне жан жылуы шынайы қалыптасқаны кіршіксіз көңіл­-дері мен жүрек лүпілдерінен айқын аңға­рылады. Үлкендерге қарап ой түзеудің, бой түзеудің жарқын үлгісі – бұл. Әкелерінің ор­ны мүлдем бөлек. Ардақты есім, асқар тау – ақылдың кені. Қысқасы, олар бір-бір үй­дің локомотиві. Аманбек пен Әбілқасым туралы осылай пайымдағанымыз ләзім.
 Кенжебеков Аманбек ұзақ жылдар бойы сауда саласында тұрақты қызмет етті. Аудандық тұтынушылар одағына қарас­ты автогаражды басқарды, жасы ұлғая бас­та­ғанда автодүкен жүргізді. Ізінен ерген інісі Әбілқасым электрлендіру жүйесі меке­месінде бастықтың орынбасары, кәсіподақ комитетінің жетекшісі болды. Іскерлік-ұйымдастырушылық қабілеттерімен ұжым­да бедел биігінен көрініп, зейнет демалы­сына шығарында мақтау-марапаттауларды иемденді. Өнегелі өмір жылдары дәріптелді. 
Ағайынды Әбекеңдер мен олардан өр­ген үрім-бұтақтың бойларында ұрпаққа өнеге боларлық қасиет бар. Жұрт алдында еңселерін тік, кеуделерін көтеріңкі ұстап, ешкімнен тартынбай, ешнәрседен қы­сыл­май еркін сөйлейтіндері де сондықтан.