Әлемдік қаржы дағдарысы үдеген тұста кәсіпкерлердің кейбірі дағдарып қалды.

Бірақ ілімін білген әрдайым ілгері басады. Ақтөбеде «Бизнестің жол картасы – 2020», «Даму-Өндіріс» бағдарламаларына жүгініп, кәсіпті көркейтуге мүмкіндік алған кәсіпкерлер қатары артты. Солардың бірқатарына «Даму» қорының Ақтөбе облыстық филиалы пресс тур ұйымдастырды. Бұл туралы Қамшы порталы Айқынға сілтеме жасап, хабарлайды.
Ақтөбеде түрлі сусындардан қалған плас­­тикалық бөтелкелерден өндіріске қа­жетті лента шығарыла бастады. Бұл – Ба­тыс Қазақстан аумағында теңдесі жоқ цех. Әдет­тегі сусынның бөтелкелері енді өнді­ріс­ке жарады. Буып-түюге арналған лента пластикалық қалдықтан жасалады. Қазан­дықта қайнап, кейін салқын су құйылған ыдыс­қа түсетін пластик лентаның қазір тәу­лігіне 280 мың метрі шығарылып жа­-тыр. Ал цехтың тәулігіне 600 мың метр лен­та шығаруға мүмкіндігі бар. Төзімді плас­тикалық ленталар ірі кірпіш, газблоктарын шығаратын цехқа қажет. «Жасыл түсті лен­та «Спрайт», ақ түстісі «Тан», ал ашық түсті лента минералды су бөтелкесінен алынған. Пластикалық қалдықты жергілікті кәсіп­кер­лер жеткізеді. Біз дайын өнім шыға­ра­мыз. Кәсіпорынды ашуға «Даму» қорының облыстық филиалы көмектесті. Ендігі мақсат – Ресейдің шекаралас облыстарына шығып, көрші елдің тапсырысын қабыл­дау» дейді кәсіпкер Альтаир Лұқманов. 
«Даму» қорының Ақтөбе облысы бо­йынша аймақтық филиалының бас менед­жері Әліби Сабырдың айтуынша, «Биз­нес­тің жол картасы – 2020» бағдарламасы іске қосылған сәттен бастап облыстағы 453 жо­ба­ға 50 миллиард теңгеден астам қаржы бө­лінген. Ал 103 жобаны субсидиялауға 
4,2 миллиард теңге жұмсалды. Негізінен, жер­гілікті кәсіпкерлер көбіне қызмет көр­сету, өңдеу саласына қажетті көмек алып ке­леді. Өңірде жол бойына кэмпинг салуды мақсат еткен кәсіпкерлер қатары да артқан. 
Мемлекеттік қолдауға жолаушылар та­сымалдайтын пойыздардың төсек-орнын жуып, үтіктеп, арнайы целлофанға салып беретін «Источник» ЖШС-і де ие болды. Қазір ірі оқу орындары мен әскери бөлім­дерге де қызмет көрсете бастады. 
Жолаушылардың жайлы төсек-орнын қамтамасыз ететін кәсіпорын он жыл бойы тек кір жуумен айналысты. Биыл қызмет көрсету аясы кеңіді. Енді «Источник» ЖШС-і пойыздың төсек-орнын жабдық­тайды. «Қызмет көрсету ауқымы кеңейген кезде «Даму» қорының облыстық филиа­лына жүгіндік. Мұнда бізге екінші деңгейлі банктен алған несиені субсидиялауға мүм­кіндік берілді. Сөйтіп, 80 миллион теңге субсидияланып, 14 пайыздың тең жартысын мемлекет төледі. Несиені кепілдендіруге мемлекет тағы 6,2 миллион теңге берді»  дей­ді кәсіпорын директоры Болатбек Бай­жанов. Қаржыға Ресейден жылы көрпе, Қы­тайдан жамылғы алынды. Ал матрасты қазақстандық кәсіпорын жасап шығарған. «Источник» ЖШС-ның директоры Болат­бек Байжановтың айтуынша, алдағы уақыт­та төсек-орын жабдықтары түгел осы жерде шы­ғарылады. Ол үшін тігін цехын ашу жос­парда бар. 
Кәсіпорында 90 адам еңбек етеді. Қыз­мет аясын кеңейткен кезде 25 адамды жұмысқа алған. 12 жылдан бері төсек-орын жуып, үтіктеп, дайындап келе жатқан Дә­мелі Жекееваның айтуынша, соңғы жыл­дары жұмыс жеңілдеді. Мұндағы кір жуатын машиналар Германия, Чехия, Ресейден шы­ға­рылған. Бір мезетте бір кір жуу ма­ши­насына 100 келі төсек жабдығы салынады. Кәсіпорында тәулігіне 5 тонна төсек жаб­дығы жуылады. 2005 жылдан бері мұнда 17,5 миллион төсек жабдығы тазаланды. 
Ақтөбеде «Даму-Өндіріс» мемлекеттік бағдарламасына жүгінген кәсіпорын да бар. Газ блоктарын шығарып, жиһаз жасайтын кәсіпорын мемлекеттік бағдарлама бойын­ша 12 миллион теңгені 6 пайыздық үстеме ақымен алды. Қаржыға қажетті құрал-жаб­дық пен көлік сатып алып, өндіріс орнын­дағы жұмысты жандандырды. Сонымен қатар «УкрТоргСтрой» ЖШС-ы осы бағ­дарлама бойынша мемлекеттік кепілдікке ие болды. «Біз бұған дейін тек төсегіш құ­рылыс материалдарын өндірумен айналы­сып келдік. Кейін құрылыс саласына тү­бе­гейлі бет бұрып, газ блоктарды шығаруды қолға алдық. Нәтижесі оңды. Мемлекеттік бағдарлама арқылы өндіріс орнындағы жұ­мыс еселеніп, тауар сатыла бастады. Же­ке тұлғалар тапсырыс беріп жатыр. Ал­дағы уақытта ірі кәсіпорындардан тапсырыс алу­ды жоспарлап отырмыз» дейді кәсіпорын директоры Қадыр Байтөбетов. Қазіргі күні күніне 18-20 текше газблок шығарылады. Алғашқы кезде өндірісте тек 6 адам жұмыс істеп жүр. «Бәсекелестіктен қорқып, бос отыруға болмайды. Кез келген тауардың өз тұтынушысы бар. Сөйтіп, кәсіпорын да на­рықта өз орнын табатынына сенімдіміз» дей­ді Қ.Байтөбетов. 
Негізінен, «Даму-Өндіріс» – өңдеуші өнеркәсіп саласындағы жеке кәсіпкерлік су­бъектілерін қолдау бағдарламасы. Бағ­дарлама арқылы тамақ, тоқыма, сусындар өндіру, киім тігу, жиһаз жасау, хи­мия өнер­кәсібі, негізгі фармацевтикалық өнімдер мен препараттар өндіру және тағы да басқа саланы дамытуға болады. Қаржы­ны «Бәй­терек Декеломент» АҚ-ы екінші деңгейлі банктерге салды. Сол арқылы биз­несті қар­жыландыру, қайта қаржылан­ды­руға мүм­кіндік берілген.