Алматыдағы Қаныш Сәт­баев атындағы Қазақ ұлттық тех­никалық зерттеу университеті жуырда «ЭКСПО–2017: университет жас ғалымдарының үлесі» атты дөңгелек үстел өткізіп, бо­ла­шақтың айтулы оқиғасына белсене араласатындықтарын білдірді.
Көрмеге айрықша үлес қо­суды мақсат тұтып отырған уни­верситет магистранттары мен жас ғалымдары осы жиында өздерінің «жасыл» экономика, баламалы энергия көздерін дамыту мен робототехника, ғарыш салаларындағы инновациялық шешімдерге арналған ғылыми зерттеулерін ұсына алды.
Жиында ЭКСПО-2017 жұ­мысына дайындық кезінде іске асырылатын жобалар ту­­­­ралы айтылып, сол жоба­лар­дың бірі «Online EXPO-2017» халықаралық байқауына ұсы­нылды. Іріктеу қорытындысы бойынша 2015, 2016, 2017 жылдары «Болашақ энергиясы» фо­румы шеңберінде шағын көрме өткізілетін болады. Екінші жоба – жоспарланған және ұсынылған іс-шараларда жоба тақырыптары кеңінен талқыланатын «G-Global–EXPO» онлайн форумы.
– Бұл көрме бізге ертең болатын үлкен сын, үлкен абырой. Біз ұжымның білікті мамандарымен болашақ энергиясын жасадық. Университетімізде ғылыми-техникалық бағдарламалар жү­зеге асырылуда, осы бағдар­ламалардың іске асуына үлес қо­сыңыздар, жас ғалымдар. ЭКСПО көрмесіне лайықты жобаларды ұсынуымыз қажет. Халықаралық тәжірибе бо­йынша ЭКСПО көрмесі сияқты ауқымды іс-шараларды өткізу туризм саласын ғана емес, сонымен бірге, экономиканың басқа да салаларын дамытуға ықпалын тигізеді. Статистикаға сүйенсек, 1 турист өзі келген ел аумағында 1,5 мың долларға жуық қаржыны жұмсап, шамамен 6-12 адамды жұмыспен қамтамасыз етеді. Осылайша, көрмені өткізуден алынатын нәтиже орасан зор, – деді жиынды ашқан ҚазҰТЗУ-дың уәкілетті тұлғасы, академик Әбдікәрім Зейнуллин.
Академиктің айтуынша, жас ғалымдар айрықша жаңалықтар ашуға ұмтылып отыр. Мәселен, қазір осы университетте акку­муляторлы батареяларды зарядкалау стансасы жасалып, сынақтан өтуде.
Сондай-ақ, дөңгелек үстел­де ҚазҰТЗУ-дың Жастар ұйым­дары комитетінің төрағасы Мәдина Еркінованың «Болашақ энергиясы ҚазҰТЗУ жас ғалым­да­­ры­ның қолында», «Физика-техникалық институты» зерт­­­ха­на­сының меңгерушісі Нұр­лан Тоқмолдиннің «Күн элементтері мен модульдерінің тік интеграцияланған өнді­рісі», Қолданбалы экология ка­федрасының оқытушысы Әсел Өсербаеваның «Баламалы энергия көздері», БЖМжМӨТ кафедрасының докторанты Дархан Ыбырайымқұлдың «Полимер және органикалық заттардың негізінде иілгіш күн батареяларының үлгілері» атты баяндамалары ұсынылды.
Оған қоса «Роботты техника және автоматиканың ақпаратты құ­ралдары» кафедрасының аға оқытушысы Руслан Үтебаев «Алматы қаласындағы электромобильдерге арналған зарядтау стансаларын басқару жүйелерін өңдеу және зерттеу» жобасын ұсынды. Баяндамалар барысында бас­қа да ғылыми зерттеулер тың­далды.

Дереккөз: егемен Қазақстан