Елордадағы жекеменшік компаниялардың бірінде жұмыс істейтін Берен Жүсіпова ғаламторды шарлап отырып, қызықты көрініске тап болыпты.
Жеміс-жидекті шоколадпен орап, дайындайтын өндірісті көрген ол «бізде неге осыны жасамасқа?» деген сұраққа байланды да қалды. Күндіз-түні тынымсыз ойланған ол жолдастарымен ақылдаса келе, идеясын қағазға түсіріп, айналасынан көмек сұрайды. Сол кезде Берен ата-анасынан Қазақстанда өз ісін бастаймын деушілерге көмек көрсететін бағдарламалары бар «Даму» қорын естіп біліпті. Мемлекеттік қордың Астана қаласы бойынша аймақтық филиалына барған ол кәсіптің көзін ашуға біртабан жақындай түсіпті. 
– Ол бізге келген соң, кеңес­ші­лермен ақылдаса отырып, жеміс-жидекті шоколадқа орап жасай­тын цехты ашу үшін бизнес жос­пар дайындады, – дейді кеше мемлекеттің демеу қаржысымен ашылған кәсіпорындарды журна­листерге аралап көрсеткен «Даму» қоры Астана қалалық фи­лиа­лының менеджері Дана Тәуіп­баева. – Қазір Береннің идеясы толықтай жүзеге асты. Білікті де тәжірибелі кондитерлер жеміс-жидек пен шоколадтан өздерінің айрықша бұйымдарын жасауда, «Astana Mall» сауда ойын-сауық орталығында дайын өнімді сату да жолға қойылды. Шоколад қо­сылған жаңа немесе құрғатылған жеміс-жидектер өте дәмді болып шықты. Берен алған несие қара­жатына өндірістік цехқа қажетті шикізат пен құрал-жабдықтар сатып алды.
Иә, «CHOCO FRUITS» ЖК-ның це­хы бүгінде Астананың орталы­ғын­да тоқтаусыз жұмыс істеп, бірнеше адамды жұмыспен қамтып отыр. Ал оның жетекшісі Береннің жасы –  не­бәрі 29-да. «Даму» қорының са­рап­шы­­лары мақсатты несиенің бір бө­лі­гі тап осы отызға толмаған  жас­­­­­­­тарға арналғанын айтады. Олар­дың түсіндіруінше, бүгінгі таңда қоғам­ның әлеуметтік-демогра­фиялық құрылымында Қазақстан жастары ең үлкен әлеуметтік топ болып та­былады. Жасы 18 бен 29 жас ара­лы­ғындағы жас азаматтар кате­го­риясы мемлекеттің барлық халық санының 20 %-на тең. Әрі бұл топ жаңа техно­ло­гияларды қолдануда өте белсенді. Елімізде кәсіпкерлердің қалып­тасуы­ның жаңа толқыны жақсы қар­қынмен жүріп жатқанына осын­дай мысалдарды көлденең тартуға болады.
– Мемлекетке рақмет айтамын, «Даму» қорының қолдауымен қия­лымда ғана жүрген идеямды шын мәнінде іске асырдым, – дейді жас кә­сіпкер Берен Жүсіпова. – Өз за­ман­дастарыма да қорықпастан өз кәсібін бастауға кеңес берер едім. Ме­нің жаңа жобам қазір аяққа тұра бас­тады. Қаладағы бірнеше нүктеден сату орындарын аштым. Ендігі Аста­надағы ірі сауда орталықтармен ке­лісімге келіп, сату көлемін ұлғай­ту­ды көздеймін. Сол сияқты жоғары оқу орындары мен кинотеатрлар, та­мақтандыру желісінің жетек­шілерімен келісімшарт жасауды қарастырып жатырмын. 
Кәсіпкерлікті дамытудың мем­ле­кеттік бағдарламалары шең­бе­рінде қолдау алған келесі нысан – «Ал­тын ұя» балабақшасы. Бір ерек­­шелігі, мұның жетекшісі Даниса Оразия да отызға толмаған. Даниса­ның жаңа жобаны бастауына өмірлік қажеттілік итермелеген екен. Кіш­кен­тай қызын балабақшаға орна­лас­тыра алмай, есіктерді тоздырған ол ақырында осындай орынды өзі ашу­ға бел байлапты. Қазіргі кезде «Алтын ұя» балабақшасында 17 бүл­діршін тәрбиеленіп жатыр. Олармен білікті мамандар айналысып, ба­ла­ларды қызықты ойын түрінде қазақ, ағылшын тілдеріне, ән, математика, логика, шапшаң оқуға үйретуде. 
Мемлекеттік бағдарламаның арзан несие қаражатын пайдалана оты­рып, Даниса ғимаратты бала-бақ­шаға бейімдеп, жөндеу жұ­мыс­тарын жүргізді, сонымен бірге қа­жетті құрал-жабдықтар мен жиһаз са­тып алған. Астанада мектепке дейін­ге білім беру мекемелеріне деген қажеттілік күн артқан сайын өсіп келетіндігін ескерсеңіз, бала­бақ­­ша қызметінің әрқашан да сұра­нысқа ие екендігін аңғаруға болады.
«Даму» қоры Астана қалалық фи­лиалының менеджері Дана Тәуіп­баеваның түсіндіруінше, «Биз­нестің жол картасы – 2020» бизнесті қолдау мен дамытудың бірыңғай бағ­дарламасы бірнеше бағыттар бойынша жүзеге асырылып келеді. Оның «Кәсіпкерлерді салалық қол­дау» бағытына сай Аймақтық үй­лестіру кеңесімен Астана қаласында 2015 жылы 12,6 млрл теңгені құрай­тын 65 өтініш оң шешімге ие болып­ты. Ал биылғы жылдың өзінде ісін жүргізуші кәсіпкерлерге 1,96 млрд теңге көлемінде субсидия төленген. Жалпы, қаржылық дағдарыс қос өк­педен қысқан сайын тығырыққа ті­релген кәсіпкерлер мемлекеттік қор­дың көмегіне жиі жүгінуде екен. Олардың, шамамен, 60 пайыздайы қа­жет етілген қаржылай қолдауды алып жатыр. 

Дереккөз: Айқын-ақпарат