Өңiрiмiзде алма бау шаруашылығын дамыту, оның келешегiн кемелдi ету мақсатында Түлкiбас ауданында семинар-кеңес өттi. Оған облыстық ауыл шаруашылығы басқармасының жауапты мамандары, аудандар мен қалалар әкiмдерiнiң орынбасарлары, бау шаруашылығымен айналысушы бағбандар қатысты. Таңдаудың осы ауданға түсуi де тегiн емес. Өйткенi, бұрын алмасымен Кеңес одағына атағы шыққан аймақтың даңқын қайта оралту жолында бүгiнгi таңда көптеген игi iстер атқарылуда.

Семинарды аудан әкiмi Ә.Тұрғымбеков ашты. Облыстық ауыл шаруашылығы басқармасының басшысы С.Тұрбеков бұл басқосу әр аймақтың өз ерекшелiгiн ескере отырып, осы маңызды саланы дамыту үшiн өзара тәжiрибе алмасу, жемiс көшеттерiн егу, оған күтiм жасаудың жаңа технологиялары мен озық әдiстерiн үйрену мақсатында ұйымдастырылып отырғанын тiлге тиек еттi. Аталмыш ауданда алма бауы шаруашылығының қарқынды түрде дамып келе жатқаны рас.

Семинарға қатысушылар алдымен Мичурин ауылдық округiне қарасты «Мөлдiр» жауапкершiлiгi шектеулi серiктестiгiнде болып, жұмысымен жете танысты. Жергiлiктi бағбандар Түркияның «Яула Филис» компаниясымен бiрлесiп, осы мерзiмде 110 гектар алқапта қарқынды бау және 5 гектар танапта тұқым бақ өсiруде.

Сонымен қатар, ауданда «Көктал», «Кентау» ЖШС, «Түлкiбас транссервис» жауапкершiлiгi шектеулi серiктестiктерi де қарқынды бау өсiрудi қолға алыпты. Түлкiбастық бағбандардың тыныс-тiршiлiгiмен толық танысқан семинарға қатысушылар өздерiн толғандырып жүрген сұрақтарын қойып, пiкiр алмасты, оңды тәжiрибелерiмен бөлiстi. Кеңесте сала бойынша атқарылып жатқан жұмыстар мен кездесетiн кедергiлер де ортаға салынды.

Жалпы таулы аймақта орналасқан, ауа райы қоңырсалқын Түлкiбас ауданы жемiс ағаштарын өсiруге өте қолайлы. Бүгiнгi таңда баудың көлемi 3115 гектарды құрап отыр. Өткен 2007–2015 жылдар аралығында мемлекеттiк бағдарламаға сәйкес алма бауы мен жүзiмдiк көлемi ұлғайтылып,

1 429 гектар алқапқа жаңа алма ағашының көшеттерi отырғызылды. Осылайша облыс әкiмiнiң Түлкiбас ауданын жемiс-жидектi аймаққа айналдыру туралы бастамасына сәйкес көптеген жұмыстар атқарылды. Алма ағаштарын өсiруге ниет бiлдiрген ауыл шаруашылығы тауарларын өндiрушiлерге қосымша жер телiмдерi берiлiп, алма баудың көлемi жылдан-жылға көбейiп келедi.

Серiкқали ЖЕКСЕНБАЕВ «Оңтүстiк Қазақстан». http://okg.kz/