Президенттің баспасөз хатшысы Берік Уәли офшорлық шоттарда Қ.Тоқаевтың әулетіне тиесілі активтер мен Швейцария және Мәскеуде бірнеше жылжымайтын мүлік бар делінген ақпаратты "фейк", "ақпараттық шабуыл" деп бағалады.
"Кейбір бұқаралық ақпарат құралдары жазып жатқандай Мемлекет басшысы Қасым-Жомарт Тоқаевтың швейцариялық банкте қаржылық шоты жоқ. Сондай-ақ Президенттің шетелдік банктер мен офшорлық компанияларға да ешқандай қатысы болмаған және шетелде жылжымайтын мүлкі де жоқ. Қасым-Жомарт Кемелұлының бұрынғы жұбайының да мақалада жазылғандай ешқашан қаржылық шоты болмаған. Тимур Тоқаевқа келетін болсақ, жасы 38-де. Ол – кәсіпкер, ешқашан мемлекеттік қызметте істемеген. Өздеріңіз білесіздер Президент экономика мен саясаттағы монополияны шектеуге, реформаларды жүзеге асыруға күш салып келеді. Бұл Мемлекет басшысының осындай шешімдерін жақтамайтын адамдардың әдейі таратып жатқан фейк ақпараттық шабуылы деп ойлаймын" делінген хабарламада.
Бұған дейін "Credit Suisse құпиялары" трансшекаралық журналистік зерттеу жобасы аясында 2012 жылы швейцариялық Credit Suisse банкіндегі есепшот жабылғаннан кейін Тоқаевтың отбасы Швейцарияда жеке шоттары бар Британ Виргин аралдарында офшорлық компаниялар ашқаны, 2014 жылы бір сәтте 5 миллион доллар активі болған Ұлыбританиядағы компанияны басқарып отырғаны айтылған. Бұған қоса Тоқаевтар отбасы Мәскеу мен Женевада құны кем дегенде 7,7 миллион доллар болатын мүлікті иеленгені айтылған.
"Сол жылдары Тоқаев жоғары мемлекеттік лауазымды қызмет атқарды, атап айтқанда, сыртқы істер министрі, премьер-министр және сенат спикері болды. Тоқаевтың да, әйелінің де кәсібі немесе басқа байлық көзі болған жоқ. Тек олардың ұлы Тимурдың нақты бизнеске қатысы болған, оның өзі де мұқият зерттеуді қажет етеді. Қазақстандық БАҚ таратқан ақпарат бойынша, ол мұнай кен орнын игеру құқығына ие болған мұнай компаниясының ортақ иесі ретінде тіркелген. Кейін бұл компания миллиондаған табыс тапты. Ол кезде Тимур енді 18 жасқа толған" делінген журналистік зерттеуде.
Пікір қалдыру