Халықаралық футбол федерациясының (ФИФА) конгресінде 2030 және 2034 жылдары әлем чемпионаттары өтетін орындар ресми түрде жарияланды.

2030  жылғы футболдан әлем чемпионаты үш континентте, алты мемлекетте өтпек. Жарыс қожайындары Марокко, Португалия және Испания болады. Cондай-ақ тарихтағы тұңғыш әлем чемпионатына 100 жыл толуына орай тағы үш ойын Уругвай, Парагвай және Аргентинада өтеді. Ал төрт жылдан кейін әлем чемпионаты – 2034 Cауд Арабиясында болады. Турнир елдің 5 қаласындағы 15 стадионда өтеді деп жоспарланып отыр. Алғашында 2034 жылғы әлем біріншілігін қабылдауға Аустралия да үміткер болған еді. Бірақ кейін жарысты өткізуге өтініш беруден бас тартқан. Айта кетейік, 2026 жылғы футболдан әлем чемпионаты 11 маусым мен 19 шілде аралығында АҚШ, Мексика және Канадада өтеді. ФИФА-ның футбол шекарасын кеңейту бағдарламасы аясында жарысқа алғаш рет 48 құрама қатыспақ. Қазақстан командасының әлем чемпионатына еуропалық іріктеу кезеңіндегі қарсыластары 13 желтоқсанда анықталады.