Australian Open-2026 турнирінде қазақстандық Анна Данилина жұптық сында ширек финалға жолдама алды. Ол сербиялық Александра Круничпен бірге 1/8 финалда алаң иелері атынан өнер көрсеткен Сторм Хантер мен Майя Джойнтты жеңді.

Матч екі сетке созылды. Кездесу 7:5, 7:6 (8:6) есебімен аяқталып, ойын уақыты 2 сағат 13 минутқа жалғасты. Екі сетте де тартыс жоғары болып, шешуші сәттерде қазақстандық-сербиялық дуэт қажетті ұпайларды өз пайдасына шеше алды.

Осы нәтижеден кейін Анна Данилина мен Александра Крунич Australian Open ширек финалына шықты. Келесі кезеңде олар чехиялық Катерина Синякова мен АҚШ өкілі Тейлор Таунсендтен құралған тәжірибелі жұпқа қарсы ойнайды.

Australian Open – теннистегі ең беделді «Үлкен дулыға» турнирлерінің бірі. Қазақстандық спортшының бұл жетістігі ел теннисі үшін маңызды нәтиже саналады.