Әлемдегі ең көне кітапханалардың бірі қайта ашылды, деп жазады Qamshy.kz ақпарат агенттігі.

24.kz порталының мәліметіне сүйенсек, Мысырдағы әулие Екатерина монастріне тиесілі бұл мекеме 2014 жылы жөндеу жұмыстарына жабылған болатын. Мұнда 6 мыңға жуық діни қолжазбалармен қатар, мыңдаған көне кітап сақталған.

Олардың арасында ежелгі грек дәрігері әрі философы Гиппократтың медициналық рецептері мен шығыс-арамей диалектінде жазылған Библияның көне көшірмелері бар.

Жалпы әулие Екатерина монастырі – ең ежелгі христиандық ескерткіштердің бірі. Ол VI ғасырда салынған.

2002 жылы ЮНЕСКО-ның дүниежүзілік мұралар тізіміне енді. Ал оның ішіндегі кітапхана тарихи-діни әдебиет саны бойынша әлемде екінші орында тұр. Ең ірісі Ватиканда орналасқан.

– Монастырде сондай-ақ әлемдегі ең ежелгі әрі ең ірі мозаикалардың бірі бар. Ол 12 жылға созылған қалпына келтіру жұмыстарынан кейін көпшілік назарына ұсынылады. Жарты миллион тастан тұратын мозаика шамамен 1400 жыл бұрын жасалған, - деді діни қызметкер Тони Казамиас.