Ерлан Зәйтенов – Шығыс Қазақ­стан облысына танымал кә­сіпкерлердің бірі.

Бородулиха ауданында орналасқан «Е.Зәй­тенов шаруа қожалығы» – біз әңгіме өзегіне айналдырып отыр­ған Ерекеңнің қолтаңбасы. Өз ісіне мығым, іскер, тәжірибелі азамат Ерлан Әмірбекұлы ұйымдастырып, басқарып отырған шаруашылық жыл өткен сайын өркендеп келеді. Оның дәлелі – кейінгі жылдардың қорытындысы. Жаңашыл, бо­лашаққа үлкен үмітпен қарайтын шаруа қожайыны маңайына, әсіресе, жастар үйір. Олар біл­мегенін үйреніп, қызығушылықпен жұмыс атқарып келеді. Ыжда­һаттылықпен істеген істің нәтижесі зор болатынын ұғынып, «Ондай болмақ қайда?» демей, өздері де істің көзін табуға барынша әрекет етіп бағуда. Ұстаз Ерланды қуан­татын да жастардың бойындағы осы қасиет. 
Негізі, «Е.Зәйтенов шаруа қожалығы» тақыр жерден пайда бола кеткен ұжым емес. Бұл меке­менің түп негізі – «Заветы Ильича» ұжымшары. Сонау бір жылдары тірлігі шатқаяқтай бастаған ұжым­шардың негізінде жеке шаруа­шылық құрып, жұмыс бастауды қолға алады. 2001 жылдың 15 наурызында жеке шаруашылық құрып, заңдастырады. Бұл шаура­шылық сол кездің өзінде-ақ Ел­басымыз Нұрсұлтан Назарбаевтың осы күні жиі айтатын әртарап­тандыру жайын басты назарда ұстайды. Шаруашылық сан салалы. Мал шаруашылығы, өсімдік ша­руашылығы мен ауыл шаруа­шылығы өнімдерін өңдеу басты нысанаға алынған. Шұжық, сүт, өсімдік майын өндіру цехтары жұмыс істеп тұр. Диірмен, наубай­хана, мал сою цехы да халыққа қызмет көрсетіп келеді. Өндірілетін нан және шұжық өнімдерінің сан түрі тұтынушының талғамына сай. Айран-сүт өнімдері, «Гауда» ірім­шігі, «Крестьянское» сарымайы, қаймақ, өсімдік майы, бірінші және жоғары сұрыпты ұн – шаруа қожалығының негізгі өнім түрлері. Ірі қара малын және шошқа сою цехтары да үздіксіз жұмыс істеп тұр. Өнімнің сапасы бұзылмай сақталуы үшін тоңазытқыш құ­ралдары пайдаланылады. Бұл туралы "Қамшы" порталы Айқынға сілтеме жасай отырып хабарлайды.

Әрине, ауылда қырық жыл іс­теп тұрған сүт фермасында күрделі жөндеу жұмыстарын жүргізіп, оны жаңадан іске қосуо ңайға түскен жоқ. 8 ай бойы қызу жұмыс жүр­гізудің нәтижесінде бүгінде заман талабына сай сүт фермасы іске қосылып, Швецияның роботтары қолданылып, оның артықшылық­тарын көріп отыр. Швециялық ДеЛаваль фирмасының көмегі­мен тауарлы сүт фермасында қойыл­ған төрт робот бұл күндері Қазақстан­да екі ғана шаруашылықта орна­ласқан. Соның бірі – осы «Е.Зай­те­нов шаруа қожалығы». Бұл жерде барлық жұмыстар компьютердің көмегімен атқарылады, үш опе­ратор кезекпен жұмыс істейді. Шаруа иелері шығаратын барлық өнім түрлері Шығыс Қазақстан облысының барлық елді мекенінде саудалануда. Мысалы: пастер­ленген сүт аудандағы мектептер мен интернаттағы оқушыларға беріледі. Сонымен қатар Семейдегі бройлерлер фабрикасына, облыс­тық ауруханаға, «Багратион» ЖШС-ға жіберіледі. Семей қала­сының жұртшылығы «Зайтеновтің ірімшігі, қаймағы бар ма?» деп өздері іздеп жүріп сатып алады. Өйткені өнімнің сапасы өте жақсы әрі экологиялық таза. Асыл тұ­қымды тайыншаларды жыл сайын Алматы облысымен көршілес Ұлан аудандарына сатады. 
– Қазіргі таңда біздің шаруа­шылыққа қарасты мекемелерде жұмыс істейтіндердің саны – 300 адам, – дейді шаруашылық бас­шысы Ерлан Әмірбекұлы. – Ауыл шаруашылығы министрлігінің бұйрығымен 2009 жылдың 5 ақпа­нынан бастап №5 «Е.Зәйтенов» шаруа қожалығы асыл тұқымды шаруашылық деп танылды. Ша­руашылықта 2600 ірі қара мал бар. Оның 700-і – сауын сиырлар. Ел арасында «Сиырдың сүті – тілінде» деген жақсы сөз бар. Бұл жақсы сүт аламын десең, сиырдың жемшөбін дұрыстап бер деген мағынаны білдіреді. Біз сондықтан ірі қара шаруашылығын ақыры қолға ал­ғаннан кейін оның күтіп-баптауы мен дер кезінде жемшөбін беріп отырғанды жөн деп табамыз. Жы­лына 100 сиырдан 90 бұзау алып, сүт өндіруді де арттырып келеміз. Шаруашылықта, сондай-ақ 130 жылқы, 100 шошқа, 250 қоян өсі­реміз. Шаруа қожалығымыз соңғы жеті жылда жұмыс қарқы­нын қалыпты сақтап келеді. Салық төлемдері мен еңбеккерлердің жалақысы уақтылы төленіп тұ­рады, ешқандай берешегі жоқ. Үш жылдағы табыс 100 миллион теңгеден асып жығылды. Бұл бізде жұмыс істейтін әрбір еңбеккердің төгілген маңдай терінің жемісі деп түсінуіміз қажет. Өйткені мұндай ауқымды жұмысты жүргізу бірен-саран адамның қолынан келмесі анық. Ұжымның ұйымшылдығы мен «Бір жағадан бас, бір жеңнен қол шығарып», ауызбіршілікпен еңбек еткенінің нәтижесі. 

Шаруа қожалығының иелігінде 14 мың гектар егістік алқап бар. Оның 11,5 мың гектарына астық пен басқа да дәнді дақылдар егілсе, 3000 гектарға көпжылдық шөп егі­леді. Шаруашылықта мал басы бол­ға­ннан кейін оның жем-азығын да ой­ламасқа болмайды. Астықтан ке­йінгі үш жылда орташа түсім гек­та­ры­на 12,0 центнерден айна­лып отыр. Жыл сайын 3 мың тонна пі­шен, 5,0 мың тонна сүрлем мен 5,0 мың тонна қыстық пішендеме дайындалады. 
Шаруашылықта жаңа техно­логиялармен жұмыс жасауға үнемі назар аударылады. Осы күні тех­никаң сайлы болмаса, мол өнім алам деп әурелену бекер. Сондық­тан да жыл өткен сайын техниканы жаңарту мәселесі біртіндеп шешімін тауып келеді. 
– Мемлекет басшысы Н.Ә.Назарбаевтың саясатын толық қолдаймын, – дейді кә­сіпкер. – Өйткені Үкімет тарапы­нан ауыл шаруашылығы саласына үлкен көмек көрсетіліп, субсидия беріледі. Мемлекеттік түрлі бағ­дарламалардың игілігін көріп келеміз. Жергілікті басшылар, атап айтқанда,Шығыс Қазақстан облысының әкімі Даниал Ахметов пен Бородулиха ауданының әкімі Григорий Акулов мырзалар үнемі бізді қолдап, жігерлендіріп оты­рады, – дейді риза көңілмен ша­руашылық басшысы. 
Ерлан Зәйтенов отбасында бүгінде Тарлан, Тайырхан, Зере, Ясмин, Амаль есімді немерелері­нің қызығын көріп отыр. Ұлы Әмір – бірнеше шет тілде еркін сөй­лейтін, экономика саласын жетік мең­герген білікті азамат. Ол қазір мұ­най саласында үздік еңбек етуде. Өз отбасымен бірге бақытты өмір сүріп жатыр. Қызы Әсел де мемле­кеттік қызмет атқарады. Жары Айгүл де кәсіпкер. Қазақтың салт-дәстүрін берік ұстанған, ері­нің қас-қабағына қарап, көңі­лінің мар­қайып, жұмысты алаңсыз істе­уіне үнемі жағдайын жасап отырады.
Ерлан Әмірбекұлы – өте қара­пайым, туысшыл, бауырмал жан. Достары өте көп. Әсіресе, бала кезден бірге өскен достардың орны ерекше. Жұмыс істеп жүрген кез­дегі достарымен де қарым-қаты­насты үзбейді. Жылдың көктем, күз айларын жақсы көреді. Раушан гүлдерін сыйлағанды ұнатады, сәлемдемесіз жүре алмайды. «Ауылдан сәлемдеме» деп әрқа­шан қолына базарлықтары салын­ған қорапшаны ұстап жүретіндігін де жасырмайды. Сүйінші сұраған адамның да көңілін қалдырмайды. Өз ауласына бау-бақша егеді. Жүз­ден аса гладиолус гүлдерін өсіреді. Көре алмайтын, қызғаншақ, өсекші адамдарды жек көреді. Өзін бір алдап кеткен адамды екінші рет маңайына жолатпайды. 
Өмірдің заңдылығы ғой, әкесі ерте қайтыс болды, сенетін ешкімі болмады. Балалық шағы орыс, неміс ұлттары араласқан ауылда өтіп, ержетті. Ол жастайынан не­міс халқының ұқыптылығын, таза­лығын, өте ретті болатынды­ғын үйренді. Әкесі Әмірбек ақ­сақал бір кездері ұжымшар бас­қарған, сөзінде тұратын, өте қайырымды адам болған. Ол кісінің есімі ауылдастарының және ел адам­дары­ның әлі жадында. 
– Ауылдастарым «Әмірбектің баласы» деп мені де құрмет тұтады, – дейді Ерлан Зайтенов. – Бұрынғы ауылымызда шешен ұлты өте көп тұрған. Әкем оларға көп қолғабыс жасағанын, көже пісіріп ішуге бидай бергенін қазір ол кісінің көзін көргендер жыр ғып айтып отырады. Ал анам өте қайратты, мық­ты адам болған. 8 бала тәр­биелеп, өсіріп, 88 жасында қайтыс болды. Нағашы аталарым қажы­лыққа барған адамдар. «Әке көрген оқ жонар, шеше көрген тон пішер» демекші, мақсатым – ата-анамнан алған тәрбиемнің арқасында елге күлкі болмай, жақсы жұмыс істеу, ілгерілеу, биіктен көріну. Мен үнемі «Қазақ ұлты ешкімнен кем емес, біздің қолымыздан бәрі келеді» дегенді маңайымдағы­ларға айтып отырамын. Жиырма жыл бұрын шаруашылықтар бытырап, тарап жатқан кезде біз шаруа­шылықты сақтап қалдық. Сол кез­ден бері халық үшін жұмыс істеп келеміз. Сол бір аумалы-төкпелі, өтпелі кезеңде аудандағы 11 ша­руашылықтан 2 ғана шаруашы­лық қалған еді. Мен үнемі халықпен біргемін. Бір сәт еңбек демалысын алған күннің өзінде өз ауылымда, өз елімде боламын. Мүмкіндігіміз болса да, шетелге шыға бер­меймін. Еліміздің бір қиырында тұрып жатсақ та, Мәңгілік ел болуға мен де өз үлесімді қосамын деп сенемін, – дейді Ерлан Әмірбекұлы ағынан жарыла. Еліміздің әрбір патриоты осындай-ақ болар.