Қазақ тілі төңірегінде тағы да дау. Бұл жолы гүл сататын "Алматы букет" дүкенінің қызметкері Жадыра Аққайыр есімді журналиске "толықтай қазақша қызмет көрсетілмесе, тапсырысымды кері қайтарыңыздар" деген сөзі үшін "сіз аурусыз, сізге емделу керек" деп зекіген.

Бұны Айгерім Тоқсанбек есімді келесі журналист facebook парақшасына салып, оқиға көпшілік назарын аударды. Желі қолданушыларының бірі болған оқиға бойынша құзырлы мекемеге шағым түсіру керегін айтса, бірі дүкеннен гүл сатып алмай, бойкот жариялауға шақырды. Енді бірі дүкеннің өзіне хабарласып, наразылық таныту керек деп жатты. Біраз адам кейінгі ұсынысты іліп әкетіп, дүкеннің желідегі парақшалары мен Whatsapp нөмеріне наразылық білдіре бастады.

Дүкен басында шағымданушыларды елемегендей болып, instagram-дағы өздері туралы жазылған жағымсыз пікірді өшіріп, пікір иесін бұғаттап отырған.

Алайда қазақтілді азаматтардың шағымы толассыз жалғасып, ақыры дегеніне жетті.

Дүкен әкімшілігі алдымен қызметкері ренжіткен журналистен, артынша Instagram арқылы көпшіліктен кешірім сұрады. Instagram парақшадағы ақпараттарды қазақшалап, Whatsapp ботты екі тілде жауап беретіндей етіп өзгертіп қойды. Whatsapp арқылы қазақша қызмет көрсетуді сұраған клиентке жылы ғана қазақша жауап қатып, сұрағанын беретін болды.