Ақпараттық-коммуникациялық технологиялар өміріміздің мәні мен сәніне айналғалы қашан. Бүгінгі күнде интернетсіз және ұялы телефонсыз өмірді елестету мүмкін емес. Қазіргі заманда компьютер мен сымсыз байланыстарды меңгермеген жан ХХ ғасырдың басындағы жазу-сызуды, оқуды білмеген адаммен тең. Осыны ескерген Мемлекет басшысы «Жаңа әлемдегі жаңа Қазақстан» атты Жолдауында елімізді ақпараттық-коммуникациялық технологиялардың ең үздік үлгілерімен қамту мәселесіне кеңінен тоқталып, тиісті органдарға бірқатар тапсырмалар жүктеген еді.
Аталған Жолдауында Елбасы: «Біз бүкіл еліміз бойынша әлемдік стандарттар деңгейінде сапалы білім беру қызметін көрсетуге қол жеткізуіміз керек», деген еді. Ақпараттық технологиялар мен ақпаратты таратудың жаңа нысандарына бағытталған мамандандырылған білім беру бағыттарын құру міндеті мен он-лайн тәсілінде оқыту тәжірибесін дамытып, елімізде оқу теледидарын құру қажет екендігі де осынау мелекеттік құжаттан орын тапқан. Себебі, халықты ақпараттық-коммуникациялық технологиялармен толық жарақтандырып, оны жеткілікті деңгейде меңгерту үшін бірінші кезекте білім беруді тиянақтап, саланы игерген сапалы мамандар жасақталуы ләзім. Осыған орай, бүгінгі күні білім беру жүйесі жаңа педагогикалық технологияға негізделуін және ақпараттық құралдардың кеңінен қолданылуын қажет етеді. Ма­мандардың пікіріне жүгінсек, оқу-тәрбие үрдісінде жаңа ақпараттық технологияларды пайдалану заман талабынан туындап отыр.
Ашық Үкімет, ашық қоғам құруды мақсат етіп қой­ған Қа­зақ­стан ақпараттық-телеко­м­му­никациялық технологияның электронды есептегіш техникасымен жұмыс істеуге, компьютерді пайдалануға, модельдеуге, электронды оқулықтарды, интерактивті құралдарды қолдануға, интернетте жұмыс істеуге, компьютерлік оқыту бағдарламаларына бас­ты назарды аударып отыр. Ақпараттық әдістемелік материал­дар коммуникациялық байланыс құралдарын пайдалану арқылы үнемі білім беруді жетілдіріп жүруді көздейді. Өйткені, ақ­па­раттық-коммуникациялық тех­нологияның келешек ұрпақтың жан-жақты білім алуына, іскер әрі талантты, шығармашылығы мол, еркін дамуына жол ашатын педагогикалық, психологиялық жағдай жасау үшін де тигізер пайдасы мол болмақ. Себебі, ХХІ ғасыр – бұл ақпараттық қоғам дәуірі, технологиялық мәдениет заманы, айналадағы дүниеге, адамның денсаулығына, кәсіби мәдениетіне мұқият қарайтын дәуір. Оның жарқын мысалы – Біріккен Ұлттар Ұйымының шешімімен «ХХІ – ғасыр ақпараттандыру ғасыры» деп аталғаны. Қуанарлығы, қазіргі кезде біздің еліміз де ғылыми-техникалық прогрестің негізгі белгісі – қоғамды ақпараттандыру болатын жаңа кезеңіне енді.
Интернеттiң мүмкiндiгi шексiз. Талғамыңыз бен көңiл-күйiңiз­ге қарай одан сiздi қызық­ты­ратын көп нәрсе табуға болады. Yйден шықпай газеттiң тың нө­мірiн парақтағыңыз келеме, мейiлiңiз. Тек WWW немесе Web деп аталатын әлемдiк шыр­мау­ықты қолдансаңыз жетедi. Гиперсiлтеме жүйесi арқылы қа­жеттi басылымыңызды қас-қағым сәтте тауып аласыз. Ин­тер­неттен ғалым да, бизнесмен де, компьютерлiк ойын әуесқойы да, бәрi-бәрi қажет мәліметін табады. Интернет осылай күнделiктi тұрмыс пен жұмыстың айнымас құралына айналып келедi. Оның негізі АҚШ-та жасалғанмен, нақты иесі жоқ. Әрбір үкімет, компания, университет ақпараттық қызмет ұсына отырып, бұл желінің тек қана өз бөлігіне иелік етеді. Осы ойға ойыссақ, интернетке жеке-дара ешкім де қожалық жасай алмайды. Сондықтан ол шын мәнінде адамзаттың әлемдік қазынасы болып табылады.
Біздің елімізде ақпараттық қоғамның біріне ғана екпін жасалды. Халықаралық рейтингтерге зер салсақ, сәтті іске асырылған электронды үкіметті қалыптастыру мен дамыту ісі жүйелі жүргізіліп келеді екен. Алайда, ақпараттық қоғамды қалыптастыру міндеті әлбетте тек электронды үкімет пен телекоммуникация саласын да­мы­туға қарағанда әлдеқайда кеңірек.
Сондықтан, ақпараттық қо­ғам­ға көшуге ықпал жасайтын бар­лық қажетті жағдайларды қарас­тыру үшін және Мемлекет басшысының «Қазақстанның әлеу­меттік жаңғыртылуы: Жалпыға Ортақ Еңбек Қоғамына қарай 20 қадам» атты мақаласында беріл­ген тапсырмаларды орындау мақ­сатында «Ақпараттық Қа­зақ­стан-2020» мемлекеттік бағ­дарламасы әзірленді.
Бағдарламаны дайындау барысында ақпараттық қоғамды құрудың халықаралық тәжіри­бе­сіне және бірқатар маңызды құжаттардың ережелеріне сүйене отырып, төрт негізгі бағыты анық­­талды. Олар – мемлекеттік бас­қару жүйесінің тиімділігін қам­та­масыз ету, ақпараттық-ком­му­­ни­­кациялық инфра­құры­лым­ның қолжетімділігін реттеу, қоғамды әлеуметтік-эконо­ми­калық және мәдени дамытуға арнал­ған ақпараттық ортаны құру мен отан­дық ақпараттық кеңіс­тікті дамыту. Аталған бағыт­тардың шеңберінде АКТ-ны жер-жерде енгізу арқылы мемле­кеттік басқаруды жетіл­діріп, ашық әрі ұтқыр үкімет құры­лады. Нәтижесінде, ақпарат­тық инфрақұрылымның қолжетім­ділігін дамыту бойынша міндеттер шешіледі.
Ақпараттық қоғамды дамыту – адами ресурстарды дамыту екені мәлім. Сондықтан, азаматтарға электронды білім алу арқылы ақпараттық технологияларды игеруге және олармен жұмыс істеуге дағдыланған жөн. Бұған қоса, өмір бойы оқуға және дайындалуға, қа­шықтан жұмыс істеуге, қолжетімді элек­тронды денсаулық сақтау қызметтерін алуға жағдай жасалуы керек. Осының бәрі аталған бағдарламада бар. Сондай-ақ, еліміздің ашық, қолжетімді және бәсекелестікке қабілетті экономикасын құру үшін, бағдарлама арқылы шаруашылықтың негізгі салаларына зияткерлік жүйелерді барынша көп енгізу көзделген. Ақпараттық қоғамға көшу саяса­тының тиімділігі, АКТ-ны кеңі­нен қолданып, электронды қыз­мет­терді көрсету жөніндегі бизнес пен мемлекеттің күшін шоғыр­ландыруға байланысты болады.
«Ақпараттық Қазақстан-2020» мемлекеттік бағдарламасы елі­міз­дің ақпараттық қоғамға көшу стратегиясын жүзеге асырудың қорытынды кезеңі болады, дейді мамандар.

Дереккөз: Егемен Қазақстан