Илон Масктың SpaceX компаниясы жасанды интеллект стартапы xAI-ды рекордтық келісіммен толықтай сатып алды. Бұл мәміле Масктың ғарыш пен AI бағытындағы амбицияларын бір экожүйеге біріктіреді.
Келісім нәтижесінде SpaceX шамамен $1 трлн, ал xAI $250 млрд деп бағаланды. xAI инвесторлары әр акция үшін SpaceX-тің 0,1433 акциясын алады, ал кейбір топ-менеджерлерге қолма-қол төлем де ұсынылған.
Сарапшылар бұл мәмілені технология саласындағы ең ірі бірігулердің бірі деп бағалап отыр. Жаңа біріккен құрылым SpaceX-тің деректер орталықтары мен AI инфрақұрылымын күшейтіп, Google, Meta, Amazon және OpenAI секілді алпауыттармен бәсекені арттырады.
Мәміле сондай-ақ биыл жоспарланып отырған SpaceX IPO-сына жол ашуы мүмкін. Маск бұл қадамды «адамзат санасын ғаламға кеңейтуге бағытталған жаңа кезең» деп атады.
