Астанада Мемлекет басшысы Қасым-Жомарт Тоқаевтың қатысуымен парламенттік реформаға арналған жұмыс тобының отырысы өтті. Жиында Парламенттің құрамы мен өкілеттік мерзімі, сайлау тетіктері, заң шығару үдерісі және биліктің өзге тармақтарымен өзара іс-қимыл мәселелері қаралды.

Президенттің айтуынша, реформаға қатысты қоғамнан 1,6 мыңға жуық ұсыныс түскен. Олардың қатарында саяси партиялар, үкіметтік емес ұйымдар, бизнес өкілдері мен сарапшылардың пікірлері бар. Бұл бастаманың кең қоғамдық талқылаудан өткенін көрсетеді.

Қасым-Жомарт Тоқаев соңғы алты айда қоғам реформаның мәні мен мақсатын терең түсіне бастағанын атап өтті. Оның айтуынша, алдағы Ұлттық құрылтай отырысында ол өз тарапынан нақты ұсыныстарын жариялайды.

Президенттің пікірінше, қолға алынған өзгерістер саяси жүйені жаңғыртуды көздейді және мазмұны жағынан ел үшін жаңа Конституция қабылдаумен тең. Реформа мемлекеттік басқару моделін қайта қалыптастыруға бағытталған.