Kórnekti qoǵam qaıratkeri, İshki ister organdarynyń ardageri, otstavkadaǵy general-maıor Murat Qalmataev dúnıeden ótti, - dep habarlaıdy Qamshy.kz.
Marqummen qoshtasý sharasy erteń saǵat 09.00-de Almatydaǵy Armıa úıinde ótedi.
Qalmataev Murat Dúısenbiuly (1936 jyly týǵan) – áskerı jáne qoǵam qaıratkeri, general-maıor (1986), jýrnalıs. 1983 jyly respýblıka İİM-niń jańadan uıymdastyrylǵan saıası bóliminiń bastyǵy bolyp taǵaıyndalyp, 1986 jyly general-maıor ataǵy berildi.
Ákesi Dúısenbi Ombydaǵy kadet korpýsynda oqyp, áskerı feldsher mamandyǵyn alǵan soń Jarma, Kókpekti aýdandarynda jappaı emdeý isin uıymdastyryp, jergilikti turǵyndardy juqpaly sheshek, oba aýrýlarynan saqtap qalýǵa kóp eńbek sińirgen. Shópten dári jasap, dárihana ashqan, sýy men batpaǵynyń emdik qasıeti kúshti kóldi taýyp, sanatorıılik emdeýdi uıymdastyrǵan. Sol «Dúısenbi kóli» qazirgi ýaqytta da halyq emdeý isine paıdalanylyp keledi.
Qalmataev 1959 jyly QazMÝ (qazirgi Qazaq ulttyq ýnıversıteti), 1967 jyly Almaty Joǵary partıa mektebin bitirgen. 1959-65 jyldary Semeı oblysy Kókpekti aýdany komsomol komıtetiniń 1-hatshysy, osyndaǵy aýdandyq «Juldyz» gazetiniń redaktory boldy. 1967-75 jyly Semeı oblysy partıa komıtetinde nusqaýshy, partıalyq-uıymdastyrý bólimi meńgerýshisiniń orynbasary (1967-75), Qazaqstan KP OK-niń ınspektory (1975-80), Oral oblysy partıa komıtetiniń hatshysy (1980-83) qyzmetterin atqardy. 1983 jyly respýblıka İİM-niń jańadan uıymdastyrylǵan saıası bóliminiń bastyǵy bolyp taǵaıyndalyp, 1986 jylǵy qarashada general-maıor ataǵy berildi. Qalmataevtyń azamattyq tulǵasy osy jylǵy jeltoqsan aıyndaAlmatyda ótip, Keńes Odaǵynyń ámirshil-ákimshil basqarý júıesin, otarshyl ımperıanyń shańyraǵyn shaıqaltqan oqıǵalar kezinde aıqyn kórindi. Ol kóterilisshi jastar jaǵyna ashyq peıil tanytyp, jazalaýshy otrádtardyń qımyldaryn tejeýge, jaraqat alǵan qyzdar men jigitterge medısınalyq kómek uıymdastyrýǵa barynsha kúsh saldy. Respýblıka Bas prokýroryna, Qazaqstan KP OK-niń 2-hatshysyna kirip, alańda «zańsyzdyqqa jol berilip jatqanyn» aıtyp, bul taǵylyqty toqtatýdy talap etti. Ádildik jolyndaǵy osy zańdy áreketteri úshin «óz qyzmetine laıyqsyz adam» retinde dereý Aýǵanstan soǵysyna jóneltildi. Qalmataev 1988-89 jyldary Aýǵanstan soǵysynda birneshe jaýapty operasıalarǵa qatysyp, basshylyq etti. Maıdannan aman-esen elge oralyp, Semeı oblysy İshki ister basqarmasyn basqardy (1989-94). 1995 jyly QR İİM-niń keńesshisi bolyp taǵaıyndaldy. Qalmataev 12-13 saılanǵan Qazaqstan Joǵarǵy Keńesiniń depýtaty bolyp saılanyp, Quqyqtyq reforma jáne zańdylyq jónindegi komıtettiń tóraǵasy boldy. İİM-niń eńbek sińirgen qyzmetkeri, «Qurmet belgisi», «Qyzyl Juldyz», «Halyqtar dostyǵy», «Otan kúzetinde» ordenderimen, 8 KSRO jáne shetel medaldarymen marapattalǵan.
