Sońǵy kúnderi áleýmettik jelilerde Ismatýlla Maqsum esimimen tanylǵan azamatqa jáne onyń qoldaýshylaryna qatysty birqatar suhbattar men jazbalar jarıalanyp, talqylanýda
Búgin Qazaqstan musylmandary dinı basqarmasy Ismatýlla Maqsumǵa qatysty resmı málimdeme jarıalady.
«Ismatýlla Maqsum jáne ony qoldaýshylardyń Qazaqstan musylmandary dinı basqarmasyna eshqandaı qatysy joq ekendigin málimdeımiz. Olardyń áreketteri men dinı ustanymdary Qazaqstan musylmandary dinı basqarmasynyń ustanymymen sáıkes kelmeıdi.
Qazaqstan musylmandary dinı basqarmasy buǵan deıin de olardyń áreketteri men dinı ustanymdaryna qatysty resmı málimdeme jasaǵan.
Dinimizde adam balasyna zorlyq-zombylyq jasaý, qorqytý, bireýdiń aqysyna qol suǵý, adamdy májbúrleý aýyr kúná bolyp sanalady», - dedi QMDB.
«Islam dini adamzat balasyn izgilikke, ózara qurmet pen yntymaq-birlikke úndeıdi» degen QMDB Qoja Ahmet Iasaýı murasy qandaı da bir toptyń jeke murasy emes ekendigin basa aıtqan.
«Qoja Ahmet Iasaýı babamyzdyń esimi men rýhanı murasyn qandaı da bir jeke tulǵanyń nemese toptyń teris dinı pıǵylda óz múddelerine paıdalanýǵa bolmaıtynyn jetkizemiz. Sebebi Qoja Ahmet Iasaýı babamyzdyń murasy – halqymyzdyń san ǵasyrlyq rýhanı qazynasy.
Qazaqstan musylmandary dinı basqarmasy halqymyzdy din atyn jamylyp, óziniń ǵana dinı ustanymyn durys sanap, adamdy ózine táýeldi etýge jáne soqyr senimge úndeıtin kez kelgen ortadan saq bolýǵa shaqyrady», - delingen resmı málimdemede.
