Búgin Abaı ýnıversıtetinde «Bala tulǵasy jáne pedagog kásibıligi: mektepke deıingi bilim berýdegi irgeli jáne qoldanbaly zertteýler» atty halyqaralyq ǵylymı-tájirıbelik Open Space ótti.
İs-shara mektepke deıingi bilim berý júıesindegi ózekti máselelerdi talqylaýǵa, bala tulǵasyn qalyptastyrýdyń ǵylymı-pedagogıkalyq negizderin zerdeleýge jáne bilim berý tájirıbesine zamanaýı zertteý nátıjelerin engizý joldaryn qarastyrýǵa arnaldy. Halyqaralyq ǵylymı-tájirıbelik alańda mektepke deıingi bilim berý sapasyn arttyrý, balanyń jeke erekshelikterin eskere otyryp damytý, pedagogtyń kásibı quzyrettiligin jetildirý jáne bilim berý úderisine ınovasıalyq tásilderdi engizý máseleleri talqylandy. Sonymen qatar, irgeli jáne qoldanbaly zertteýlerdiń nátıjelerin tájirıbede qoldaný, pedagogıkalyq ǵylym men bilim berý uıymdary arasyndaǵy baılanysty nyǵaıtý máselelerine nazar aýdaryldy.
Búgingi bala aqparatty burynǵydan erte qabyldaıdy, sıfrlyq ortaǵa tez beıimdeledi, suraq qoıady, óz oıyn erkin jetkizýge umtylady. Onyń sóıleýi, oılaýy, qıaly, qarym-qatynasy men emosıasyn basqarýy da ózindik erekshelikke ıe. Mundaı ózgeris balabaqshadaǵy tárbıeshige de jańa mindet júkteıdi. Baladaǵy damý ereksheligin erte baıqaý, onyń qabiletin ashý jáne qıyndyqtardyń aldyn alý úshin pedagogqa qandaı bilim men qural qajet? Búgingi tárbıeshi qandaı bolýy kerek? Open Space barysynda mamandar osy suraqtar boıynsha baıandamalar jasady. Jıynda otandyq jáne sheteldik ǵalymdar men pedagogtar tájirıbe almasyp, mektepke deıingi bilim berýdi jetildirýge baǵyttalǵan naqty usynystaryn usyndy. Alańda ǵylymı-ádistemelik kórme, plenarlyq jáne fokýs-sessıalar, sheberlik synyby qarastyryldy.
Open Space jumysyna sáıkes, №187 bóbekjaı-balabaqshasy bazasynda «USHQYN LAB» ǵylymı-ınnovasıalyq zerthanasy ashylǵanyn aıta ketý kerek. Zerthana ǵylym men balabaqsha tájirıbesin toǵystyrýdy maqsat etedi.
İs-shara pedagogıka ǵylymdarynyń kandıdaty, qaýymdastyrylǵan profesor Ulbosyn Qyıaqbaevanyń 60 jas mereıtoıyna arnalǵan. Abaı atyndaǵy QazUPÝ Basqarma tóraǵasy-Rektor Bolat Tilep mereıtoı ıesine quttyqtaý sózin joldap, «Abaı» tósbelgisi tabystaldy. Sondaı-aq QR Oqý-aǵartý mınıstrliginiń vıse-mınıstri Shynar Aqparovanyń quttyqtaý haty men elimizdiń birqatar joǵary oqý orny basshylary atynan joldanǵan quttyqtaýlar oqylyp, syı-sıapattar jasaldy.
Qazirgi mektepke deıingi bilim berý júıesindegi basty mindetterdiń biri – balanyń jeke tulǵalyq damýyn qamtamasyz ete otyryp, onyń tanymdyq qabiletterin, shyǵarmashylyq áleýetin, áleýmettik daǵdylaryn qalyptastyrý. Bul turǵyda pedagogtyń kásibı sheberligi, ǵylymı-ádistemelik daıarlyǵy men ár balanyń jeke erekshelikterin eskere bilýi erekshe mańyzdy. Atalǵan mindetterdi tıimdi sheshý úshin pedagogıkalyq ádisterdi keńinen qoldanyp, tárbıeshilerdiń kásibı biliktiligin úzdiksiz arttyrý, ınovasıalyq tehnologıalardy engizý qajet.
Halyqaralyq ǵylymı-tájirıbelik Open Space osy baǵyttaǵy ózekti máselelerdi talqylaýǵa, tájirıbe almasýǵa, mektepke deıingi bilim berý sapasyn arttyrýǵa baǵyttalǵan tıimdi sheshimderdi qarastyrýǵa múmkindik berdi.
«Abai University» medıa ortalyǵy
