Qazaqstan Respýblıkasynyń Mádenıet jáne aqparat mınıstri Arman Qyryqbaev Ázerbaıjan Respýblıkasynyń Qazaqstandaǵy Tótenshe jáne Ókiletti Elshisi Alımırzamın Askerovpen kezdesti.
Kezdesýde taraptar mádenıet, mýzeı isi, buqaralyq aqparat quraldary men kreatıvti ındýstrıa salalaryndaǵy yntymaqtastyqty damytý jóninde pikir almasty.
Arman Qyryqbaev elshini qyzmetke taǵaıyndalýymen quttyqtap, Qazaqstan men Ázerbaıjan arasyndaǵy tarıhı, mádenı jáne baýyrlastyq baılanystar ekijaqty yntymaqtastyqtyń berik negizi ekenin atap ótti.
Taraptar mádenı-gýmanıtarlyq baılanysty odan ári nyǵaıtýǵa erekshe nazar aýdardy. Atap aıtqanda, eki eldiń mádenıet kúnderin ótkizý, mýzeı jáne kórme jobalaryn júzege asyrý, kreatıvti ındýstrıa salasynda tájirıbe almasý máselelerin talqylady.
Sondaı-aq Ázerbaıjan Respýblıkasynyń Prezıdenti Ilham Álıevtiń 2025 jylǵy qazanda Qazaqstanǵa jasaǵan memlekettik sapary kezinde joǵary deńgeıde qol jetkizilgen ýaǵdalastyqtarǵa sáıkes 2026-2028 jyldarǵa arnalǵan mádenı yntymaqtastyq baǵdarlamasyn ázirleý barysy sóz boldy.
QR Mádenıet jáne aqparat mınıstrliginiń baspasóz qyzmeti