Qazaqstan Respýblıkasynyń Quryltaıynda onlaın-platformalar men mass-medıa máselelerine qatysty zań jobalary birinshi oqylymda qaraldy. Olardyń negizgi erejelerin Mádenıet jáne aqparat mınıstri Arman Qyryqbaev tanystyrdy.
Mınıstrdiń aıtýynsha, medıa keńistiktegi jańa syn-qaterler zańnamany jetildirýdi qajet etedi. Usynylǵan túzetýler onlaın-platformalardyń jaýapkershiligin arttyrýǵa, balalardyń ınternettegi qaýipsizdigin qamtamasyz etýge jáne azamattardyń quqyqtaryn qorǵaýǵa baǵyttalǵan.
Zań jobalarynda onlaın-platformalardyń Qazaqstanda zańdy tulǵa retinde ókildik ashýy týraly talapty bekitý usynylady. Quqyqqa qaıshy kontentti, sonyń ishinde balalarǵa qatysty kıberbýllıng dep tanylǵan aqparatty joıý jónindegi nusqamany oryndamaǵany úshin ákimshilik jaýaptylyq kózdelgen. 2026 jyldyń alǵashqy on aıyndaǵy monıtorıń barysynda quqyqqa qaıshy 128,5 myń materıal anyqtalyp, olardyń shamamen 70 paıyzy joıylǵan.
Sondaı-aq paıdalanýshylardy jáne bes myńnan astam jazylýshysy bar ashyq qaýymdastyqtardy sáıkestendirý tetikterin engizý usynylady.
Balalardy qorǵaýǵa erekshe kóńil bólingen. Zań jobalary 16 jasqa tolmaǵan balalardyń onlaın-platformalarǵa tirkelýine tyıym salýdy jáne platformalardy paıdalanýshylardyń jasyn tekserýge mindetteýdi kózdeıdi. Bul shekteý balalardyń ata-anasymen, jaqyndarymen jáne muǵalimderimen baılanysýyna arnalǵan messendjerlerge qoldanylmaıdy.
Aýdıovızýaldyq qyzmetter salasynda tele- jáne radıoarnalardy tıisti platformalar arqyly taratýdy lısenzıalaý, sondaı-aq onlaın-kınoteatrlardy Qazaqstandaǵy zańdy ókilin belgileýge mindetteý usynylady.
Azamattardyń ar-namysyn, qadir-qasıetin jáne iskerlik bedelin qorǵaý úshin nuqsan keltiretin málimet qaı jerde jarıalansa, ony sol derekkózde, onyń ishinde áleýmettik jelide teriske shyǵarý kózdelgen. Buǵan qosa, onlaın-platformalarda jala japqany, al mass-medıa men platformalarda bylapyt sóz qoldanǵany úshin ákimshilik jaýaptylyq engizý jáne adamnyń beınesin kelisiminsiz paıdalaný sharttaryn naqtylaý usynylady.
Túzetýlerde memlekettik organdardyń resmı jaýaptaryn buqaralyq aqparat quraldarynda jarıalaǵanda arnaıy belgileý, sondaı-aq bilim berý kýrstary men okkýlttik qyzmetter týraly aqparattyń ashyqtyǵyn arttyrý qarastyrylǵan.
Usynylǵan normalar memleket pen onlaın-platformalar arasyndaǵy ózara is-qımyldy jaqsartyp, aqparat keńistiginde azamattardyń quqyqtaryn qorǵaý kepildikterin kúsheıtýge baǵyttalǵan. Zań jobalaryn iske asyrý respýblıkalyq búdjetten qosymsha shyǵyndy talap etpeıdi.
QR Mádenıet jáne aqparat mınıstrliginiń baspasóz qyzmeti