Marat Eleýsizuly Almaty oblysy aktıviniń aldynda tórt jylda atqarylǵan aýqymdy jumystardyń nátıjesin túıindedi. Kezdesý barysynda ol aımaqtyń damýyna úles qosqan áriptesterine, quqyq qorǵaý organdaryna, aýmaqtyq departamentterge alǵys aıtyp, oblys turǵyndaryna sheksiz rızashylyǵyn bildirdi. 

«Búgin óńir basshysy retinde sizdermen júzdesip, birge atqarǵan aýqymdy jumystarymyzdy qorytyndylaıtyn jaýapty sátte turmyz. Ózderińizben birge Almaty oblysy men Jetisý oblystaryn bólip, jańa óńir qurylǵan tarıhı kezeńde jumys istedik. Asa jaýapty kezeńde týǵan óńirimdi basqarýdy senip tapsyryp, aımaqtyń órkendep, damýyna únemi qoldaý bildirgen Memleket basshysy Qasym-Jomart Kemeluly Toqaevqa alǵysymdy bildiremin. Sondaı-aq osy kezeńde júzege asyrylǵan reformalardy durys qabyldap, qoldaǵan óńir halqyna da rızashylyǵym sheksiz. Bul osy oblystyń týmasy retinde men úshin, jalpy barshamyz úshin úlken múmkindikter ýaqyty boldy», – dedi ol. 

Marat Sultanǵazıev sondaı-aq birlesken jumystyń nátıjesi jemisti bolǵanyn, sonyń arqasynda óńir ekonomıkasy eselep artqanyn jetkizdi. Atap aıtqanda, Almaty oblysy ekonomıkalyq kórsetkishter boıynsha respýblıkadaǵy úzdik bestiktiń qataryna berik ornyǵyp, óńirdegi donor aýmaqtar sany ekeýden jetige artqan.

«Jetistikterge jetý jolynda ózderińizben kúsh biriktire otyryp, óńir áleýetin arttyrý baǵytynda birtutas ujym bolyp, nátıjeli eńbek ettik. Barlyq bastamalarymyz ben ıgi isterdi júzege asyrý jolynda Úkimet pen Prezıdent Ákimshiliginiń de qoldaýyn sezindik. Osy ýaqyt ishinde bir jeńnen qol, bir jaǵadan bas shyǵaryp, birlikte qyzmet atqarǵan ujymǵa jáne aýmaqtyq departamentterge, quqyq qorǵaý organdaryna da rızashylyǵym sheksiz», – dedi Marat Sultanǵazıev. 

Sondaı-aq qazirgi ýaqytta oblysta qurylys salasy qarqyn alyp, serpindi órleý kezeńi júrip jatqanyna toqtaldy. Sóz sońynda jańa basshyǵa sáttilik tilep, óńir jetistikteri budan da mol bolatynyna senim bildirdi. 

«Aldaǵy ýaqytta da osy qalypty saqtap, jumysty báseńdetpeı, jańadan keletin óńir basshysyna tolyq qoldaý bildirip, bir kisideı jemisti jumys atqarady dep senemin. Óńirdi ári qaraı damytý jolynda jańa basshyǵa da sáttilik tileımin! Almaty oblysynyń bolashaǵy budan da jarqyn, jetistikteri budan da mol bolaryna kámil senemin», – dedi Marat Eleýsizuly.