Almaty oblysyndaǵy Sokol International Circuit avtodromynda Ortalyq Azıada alǵash ret uıymdastyrylǵan FIA Central Asia Drifting Cup 2026 drıft jarysy ótti. Halyqaralyq dodaǵa Qazaqstan, Qyrǵyzstan, Mońǵolıa, Ózbekstan jáne Reseıden kelgen 20 avtoshabandoz qatysty. Bul jarysty Qazaqstannyń Avtomotosport federasıasy men Qyrǵyzstannyń Avtomotosport jáne jol qaýipsizdigi federasıasy birlesip uıymdastyrdy.
Úsh kúnge sozylǵan dodada pılottar baryn saldy. Jarys erejesi boıynsha avtoshabandozdar joǵary jyldamdyqpen júıitkip kelip, burylystardy dál baǵyndyrýy tıis. Aldymen irikteý kezeńinen ótken kil myqtylar, keıin juptyq básekede baqsynasty.
Al, jarys alańyndaǵy jankúıerler shabandozdardyń sheberligin tamashalap, dóńgelekten shyqqan kók tútin men qulaq tundyrar kólik úninen keremet áser aldy. Tipti jınalǵan jurt drıft kólikterin jaqynnan kórip, pılottarmen tildesip, qoltańba aldy. Al avtodrom aspanynda Qazaqstan, Qyrǵyzstan jáne FIA týyn ustaǵan parashútshiler óner kórsetti.
Halyqaralyq sharanyń ashylý saltanatyna Almaty oblysy ákiminiń orynbasary Ǵanı Maılybaev qatysyp, avtoshabandozdarǵa sáttilik tiledi. Sondaı-aq FIA-nyń alǵashqy aımaqtyq drıft Kýbogynyń Qazaqstanda ótýi elimiz úshin ǵana emes, Ortalyq Azıadaǵy avtosporttyń damýy úshin de mańyzdy ekenin atap ótti.
“Avtosporttan halyqaralyq deńgeıdegi jarysty Almaty oblysynda uıymdastyrý – biz úshin úlken jaýapkershilik ári jańa tájirıbe. Óńirde sporttyq ınfraqurylymdy damytýǵa, halyqaralyq jarystar ótkizýge jáne buqaralyq sportty qoldaýǵa erekshe mán beriledi. Búgingi doda – tek sporttyq báseke ǵana emes. Bul – Ortalyq Azıa elderiniń sportshylaryn toǵystyryp, tájirıbe almasýǵa, kásibı sheberlikti shyńdaýǵa jáne óńirdegi avtosport mádenıetin damytýǵa múmkindik beretin mańyzdy doda”,-dedi Ǵanı Maılybaev.
Al FIA Drıft komısıasynyń tóraǵasy, japonıalyq Koıchı Mýrata jarysty uıymdastyrýǵa atsalysqan Qazaqstan men Qyrǵyzstannyń avtomotosport federasıalaryna, Sokol International Circuit komandasyna jáne mamandarǵa alǵys bildirdi.
Jarystyń eń tartysty sáti fınalda boldy. Drıft kezinde qazaqstandyq pılot Oleg Hrıdochkın mingen kóliktiń róliniń gıdravlıkalyq kúsheıtkishi (GÝR) isten shyqty. Ereje boıynsha tóreshiler aqaýdy qalpyna keltirýge bes mınýt qana ýaqyt berdi. Biraq mehanıkter ony jóndep úlgergen joq. Soǵan qaramastan Hrıdochkın jarys jolyna shyǵyp, halyqaralyq dodanyń bas júldesin jeńip aldy.
Kóligimniń róli isten shyqqan soń, jeńiske jetemin degen oı bolǵan joq. Bas júlde qarsylasym Mıhaılǵa buıyratynyna senimdi boldym, ony tipti jeńisimen quttyqtap qoıdym. Biraq tóreshiler eki jarystyń qorytyndysyn eskere otyryp, birinshi oryndy maǵan berdi. Shynymdy aıtsam, qara kúshtiń arqasynda uttym», – dedi Oleg Hrıdochkın.
Osylaısha FIA Central Asia Drifting Cup 2026 jarysynyń bas júldesin Nissan 200SX kóligin tizgindegen Oleg Hrıdochkın ıelendi. Ekinshi oryndy Nissan 350Z kóligimen Mıhaıl Pak, úshinshi oryndy Nissan 200SX kóligimen Aleksandr Bochkarev aldy.
Úsh júldeger de – Qazaqstan pılottary. Jeńimpazǵa – 6,5 mln teńge, ekinshi oryn ıegerine – 4,5 mln teńge, úshinshi oryn alǵan pılotqa – 3,5 mln teńge aqshalaı syıaqy tabystaldy.
Bul jarys Ortalyq Azıa elderiniń pılottaryna FIA Kýbogy aıasynda baq synaýǵa múmkindik berdi. Al, jarys uıymdastyrýshylary, tóreshiler men tehnıkalyq mamandar halyqaralyq deńgeıdegi dodany joǵary deńgeıde ótkizip, mol tájirıbe jınady.
