Almatyda VI respýblıkalyq «100 ÓLEŃ» kórkemsóz oqý baıqaýynyń qorytyndysy shyǵaryldy. Bıyl elimizdiń ár óńirinen 3000-nan astam adam qatysqan baıqaýda 35 qatysýshy fınalǵa joldama aldy.

Solardyń arasynan úzdik shyqqan Astana qalasyndaǵy №107 jalpy orta bilim beretin mekteptiń dırektory Aıgúl Bazarbaıqyzy bas júldege ıe boldy. Jeńimpazǵa avtokólik tabystaldy.

Aıgúl Bazarbaıqyzy baıqaýdyń negizgi talabyn oryndaý úshin 100 kún ishinde qazaq aqyndarynyń 100 óleńin jattap, fınaldyq kezeńde shyǵarmalardy kórkemsóz sheberligimen oryndady. Ol — pedagog-sheber, Ybyraı Altynsarın tósbelgisiniń ıegeri.

Baıqaýdyń bıylǵy ereksheligi — fınalǵa túrli mamandyq ıeleriniń shyǵýy. Olardyń qatarynda fızık, matematık, geograf, metalýrg, aqyn, fılolog, aıtysker, muǵalimder, stýdentter men mektep oqýshylary boldy.

Al bas júlde ıegerine qatysty taǵy bir qyzyqty jaıt bar. Aıgúl Bazarbaıqyzynyń júrgizýshi kýáligi joq. Iaǵnı, 100 óleńdi jattap, bas júlde retinde avtokólik utyp alǵanymen, ázirge kólikti ózi júrgize almaıdy.

Baıqaýda II oryndy 10 jasar Seıtqazy Raıana Nurjanqyzy ıelendi. Al III oryn Astana qalasynyń ókilderi Tileýjan Erǵanatuly men Aıdos Bektursynǵa buıyrdy.

Altynshy ret uıymdastyrylǵan «100 ÓLEŃ» baıqaýy qazaq poezıasyn dáriptep, ulttyq sóz ónerine degen qyzyǵýshylyqty arttyrýdy maqsat etedi. Joba jyl saıyn óleńdi jatqa oqý dástúrin jańǵyrtyp, ádebıetke ártúrli jastaǵy jáne túrli mamandyqtaǵy adamdardy tartyp keledi.