Halyqaralyq «Omby – Maıqapshaǵaı» avtomobıl jolynyń boıyndaǵy Baıbýra jylytý beketiniń ashylý saltanatyna oblys ákimi Berik Ýálı, «QazAvtoJol» UK» AQ basqarma tóraǵasy Darhan Imanashev qatysty.

Taýly aımaqta ornalasqan Baıbýra asýynda qatty jel, uzaqqa sozylatyn boran men qarly burqasyn jıi kezdesedi. Jańǵyrtylǵan beket osyndaı jaǵdaıda jolda qalǵan júrgizýshiler men jolaýshylardy ýaqytsha ornalastyrýǵa, arnaıy tehnıkanyń jumysyn qamtamasyz etýge arnalǵan.

Erekshe atap óterligi, bul – respýblıka boıynsha iske qosylǵan alǵashqy jylytý beketi.

Nysandy jańǵyrtý jumystary bıylǵy mamyr-qyrkúıek aılary aralyǵynda júrgizildi. Munda 20 adamǵa arnalǵan jylytý jáne demalý orny, asqana, sanıtarıalyq toraptar men jýyný bólmesi qarastyrylǵan. Sonymen qatar, eki tehnıkaǵa arnalǵan jyly angar, kólemi 350 tekshe metr bolatyn qum jáne taıǵaqqa qarsy materıaldarǵa arnalǵan jabyq qoıma salyndy. Nysannyń aýmaǵynda tikushaq alańy da bar. Bul, ásirese, kúrdeli aýa raıy jaǵdaıynda qutqarý jáne shuǵyl medısınalyq kómek kórsetý jumystaryn uıymdastyrý úshin mańyzdy.

Baıbýra asýyndaǵy kúrdeli tabıǵı-klımattyq jaǵdaı qys mezgilinde kólik qozǵalysyna aıtarlyqtaı áser etedi. 2024 jylǵy 16 aqpanda bolǵan boran kezinde osy aýmaqta 126 kólik qar qursaýynda qaldy. 384 adamdy qutqarý jumystaryna eki Mı-17 tikushaǵy jumyldyrylǵan bolatyn.

Bekettiń ashylý saltanatynda quttyqtaý sóz sóılegen aımaq basshysy jol qaýipsizdigin qamtamasyz etýde mundaı nysandardyń mańyzy zor ekenin atap ótti.

«Memleket basshysy Qasym-Jomart Kemeluly Toqaev kólik-logıstıka salasyn strategıalyq basymdyqtardyń biri retinde atap ótip, avtomobıl joldarynyń sapasy men qaýipsizdigin qamtamasyz etýge erekshe mán berip keledi. Prezıdent atap ótkendeı, «avtokólik joldary – eldiń ekonomıkalyq jáne áleýmettik tynys-tirshiliginiń kúre tamyry». Sondyqtan joldyń sapasy men qaýipsizdigi tek jol jabynynyń jaǵdaıymen shektelmeıdi. Jol boıyndaǵy ınfraqurylymnyń, ásirese, tótenshe jaǵdaı kezinde azamattarǵa qajetti kómek kórsetýge daıyn bolýynyń mańyzy zor. Búgingi jańadan salynǵan Baıbýra jylytý beketi – osy baǵyttaǵy naqty jumystardyń nátıjesi. Biz úshin eń basty nátıje – nysannyń syrtqy kórinisi nemese tehnıkalyq jabdyqtalýy ǵana emes. Eń bastysy – qıyn jaǵdaıda jol boıynda qalǵan azamattyń jyly, qaýipsiz jerge ornalasyp, qajetti kómek alýy jáne jaqyndaryna aman-esen oralýy. Bul – adam ómiri men densaýlyǵyn qorǵaýǵa baǵyttalǵan naqty jumys. Osy jobany iske asyrýǵa úles qosqan Kólik mınıstrligine, «Qazavtojol» mekemesine, merdiger uıymdardyń qyzmetkerlerine, jobalaýshylarǵa, tehnıkalyq jáne avtorlyq qadaǵalaý mamandaryna, jol qyzmetine, qutqarýshylarǵa jáne osy nysandy salýǵa atsalysqan barsha azamattarǵa oblys jurtshylyǵy atynan alǵysymdy bildiremin», – dedi Berik Ýálı.

«QazAvtoJol» UK» AQ basqarma tóraǵasy Darhan Imanashev óńirde jol ınfraqurylymyn jaqsartý baǵytynda aýqymdy jumystar atqarylyp jatqanyn atap ótti.

«İri jol jobalarynyń kóbi Abaı oblysynan bastaý alyp jatyr. «Taldyqorǵan – Óskemen», «Qalbataý – Maıqapshaǵaı», «Semeı – Qalbataý» joldary qalypqa keltirilip, sońǵy jyldary jaqsy nátıjege qol jetkizdik. Qazir oblystaǵy respýblıkalyq mańyzy bar joldardyń qanaǵattanarlyq jaǵdaıdaǵy úlesi 80 paıyzǵa deıin jetti. «QazAvtoJol» Ulttyq kompanıasy satyp alǵan 1800-den astam tehnıkanyń keminde 10 paıyzy Abaı oblysyna shoǵyrlanǵan. Aldaǵy ýaqytta da óńirdegi joldardyń jaǵdaıyn kezeń-kezeńimen jaqsartý jumystary jalǵasa beredi», – dedi ol.

Shara barysynda aımaq basshysy arnaıy tehnıkalardyń kiltin de tabystady.

Jylytý beketin jańǵyrtý Qytaı Halyq Respýblıkasy – Maıqapshaǵaı – Zaısan qalasyn aınalyp ótý – Qalbataý – Semeı – Pavlodar – Reseı Federasıasy shekarasy baǵytyndaǵy KAZ07 respýblıkalyq mańyzy bar avtomobıl jolynda júzege asyryldy. Joba «Qalbataý – Maıqapshaǵaı» jolynyń 906-1321 shaqyrymyn rekonstrýksıalaýdan únemdelgen búdjet qarajaty esebinen iske asyryldy.

Baıbýra asýyndaǵy 40 shaqyrym jol da qaıta jańǵyrtyldy. Munda 3 kópir, 51 sý ótkizý qubyry salynyp, 42 665 tekshe metr tosqaýyl qorshaýy men 425 jol belgisi ornatyldy. Negizgi qurylys-montaj jumystary aıaqtalyp, kólik qozǵalysy qamtamasyz etilgen. Qardan qorǵaıtyn qorshaýlar men sý burý naýalaryn ornatý jalǵasýda.

Abaı oblysyndaǵy avtomobıl joldarynyń jalpy uzyndyǵy – 10 044 shaqyrym. Respýblıkalyq mańyzy bar joldardyń 447,5 shaqyrymynda jóndeý júrgizilýde. 188 shaqyrymynda qaıta jańǵyrtý, 259,5 shaqyrymynda ortasha jóndeý jumystary atqarylýda. Oblystyq jáne jergilikti joldardyń taǵy 222,6 shaqyrymy ortasha jóndeýmen qamtylǵan. Jol qaýipsizdigin arttyrý maqsatynda 2 500-den astam jol belgisi ornatylyp, 4812 shaqyrym jol tańbasy jańartyldy. Sondaı-aq 13 shaqyrym janýarlardan qorǵaıtyn qorshaý, jaıaý júrginshiler qorshaýlary men dóńgelek tosqaýyldar ornatyldy. Oblysta 2 865 beınekamera jumys isteıdi.