Búgin Abaı ýnıversıtetinde Qazaqstan Jýrnalıser odaǵynyń múshesi, jýrnalıs-redaktor Bıfat Eltaevanyń «Syr-suhbat – kóńil aınasy» kitabynyń tusaýkeseri ótti. Ádebı-rýhanı jıynǵa belgili qalamgerler, óner jáne qoǵam qaıratkerleri, ǵalymdar, kásipkerler, ustazdar men stýdentter qatysty.
KİTAP NE JAILY?
«Syr-suhbat – kóńil aınasy» kitabyna avtordyń ár jyldary respýblıkalyq «Jas Alash», «Aıqyn» gazetterinde, «Qamshy.kz» aqparattyq agenttiginde jáne basqa da buqaralyq aqparat quraldarynda jarıalanǵan suhbattary toptastyrylǵan. Súbeli suhbat keıipkerleri óner adamdary, tanymal kásipkerler, densaýlyq saqtaý jáne psıhologıa salasynyń mamandary, balalar ádebıetiniń ókilderi, ustazdar men qoǵam qaıratkerleri.
Jınaqtaǵy ár suhbat keıipkerdiń bolmysyn, ómirlik ustanymyn jáne óz dáýiriniń tynysyn tanytady. Qoǵamdaǵy ózgerister, adam taǵdyry, óner men eńbektiń qadiri, ómirdiń san qyrly qubylystary baıandalady. Jańa kitap oqyrmandy tyń oıǵa jetelep, tulǵalar ómirinen taǵylym alýǵa jol kórsetedi.
AQ BATAMEN ASHYLǴAN TUSAÝKESER
Tusaýkeser jıynnyń shymyldyǵy jazýshy, kenshi, ınjener, Túrkistan jáne Kentaý qalalarynyń qurmetti azamaty Óskenbaı Qulataıulynyń aq batasymen ashyldy. Jazýshy ártúrli mamandyq ıesimen suhbattasý úshin jýrnalısiń bilim kókjıegi keń, ıntellektýaldyq oı-órisi joǵary bolýy qajet ekenin alǵa tartty.
– Qanshama adamnan suhbat alyp, ony jaryqqa shyǵarýda ádemi ıirimdermen kesteleý – jýrnalısiń sheberligi. Ár mamandyq ıesine suraq qoıý ońaı emes. Ol úshin tilshiniń bilimi men biligi joǵary bolý kerek. Jolyń aq bolsyn, qalamyń kidirmesin. Tolaǵaı tabys tileımin! – dedi Óskenbaı Qulataıuly.
Jańa kitaptyń tusaýyn jazýshy Óskenbaı Qulataıuly, Qazaqstannyń eńbek sińirgen qaıratkeri Shámil Ábiltaı, jazýshy-pýblısıst Marat Toqashbaev, sáýletshi, qoǵam qaıratkeri Haırýlla Ǵabjalılov pen jýrnalıs, balalar jazýshysy Beısenbaı Súleımenov kesti.
ULTYMYZǴA RÝHANI AZYQ BOLSYN
Kúıshi Shámil Ábiltaı jınaqtaǵy suhbat keıipkeriniń biri ekenin aıtyp, avtorǵa aqjarma tilegin jetkizdi. Al jazýshy-pýblısıst Marat Toqashbaev Bıfat Nurmahanqyzynyń jýrnalısıkadaǵy shákirti sanaıtynyn atap ótti. Ol birneshe jyl buryn jas jýrnalısiń suhbat alǵan sátin eske alyp, kásibı batyldyǵyna tánti bolǵanyn jetkizdi.
– Osydan jeti-segiz jyl buryn bir qyz bala telefon shaldy. Áńgime barysynda sol zamandaǵy saıasatqa úılese bermeıtin pikirler aıtyldy. Sondyqtan suhbat jarıalanbaıtyn shyǵar dep oıladym. Keıin ol «Jas Alashqa» shyǵypty. Tamasha suhbat boldy. Sol kezde Bıfattyń batyl jýrnalıs ekenin moıyndadym, – dedi Marat Toqashbaev.
QOǴAMDYQ SANANY QALYPTASTYRATYN MAMANDYQ
İs-shara barysynda sáýletshi, ulttyq valúta – teńgeniń alǵashqy dızaınyn jasaǵan avtorlar tobynyń jetekshisi Haırýlla Ǵabjalılov jýrnalısıkanyń qoǵamdaǵy ornyna toqtaldy. Óz sózinde tilshi mamandyǵynyń qoǵamdyq sanany qalyptastyratyn jetkizdi. Sondaı-aq kınorejısser, senarıst Erkin Raqyshev jańa kitapqa eki suhbaty jarıalanǵanyn aıtty. Onyń sózinshe, keıipkerdiń pikirin burmalamaı, aıtylǵan oıdy dál jetkizý – jýrnalıs jaýapkershiligi.
– Keıbir jýrnalıser ótkir aıtylǵan pikirlerdi jarıalaýǵa batyly barmaıdy. Al Bıfat meniń sózimdi birde-bir ózgertpeı, qaz-qalpynda berdi. Bul kitap stýdentter úshin áleýmettik-saıası máselelerdi jete túsinýge asa qajet dep oılaımyn, – dedi rejıser.
KEIİPKER ÁLEMİNE TEREŃDEÝ
Balalar jazýshysy Beısenbaı Súleımenov kitap jazý úshin talant pen qosa tabandylyq qajettigin alǵa tartty. Ár keıipker segiz qyrly, bir syrly tulǵa bolǵandyqtan, suhbat arqyly bir ǵana qyryn ashýy múmkin. Al onyń minezin, ishki álemin tereńirek ashýǵa umtylý keregin jetkizdi.
Aqyn, halyqaralyq «Alash» ádebı syılyǵynyń laýreaty Bolat Sharahymbaı avtordyń jýrnalısıkadaǵy qoltańbasyn burynnan biletinin, Bıfat Eltaevanyń jastaıynan jýrnalısıkaǵa aralasyp, 22 jasynda gazet redaktory bolǵanyn aıtty.
– Bıfat – ashyq sóıleıtin, batyr da batyl jýrnalıs. Ol suraqty durys qoıa biledi. Endi budan da tereńdep, kúrdeli taqyryptardy qaýzaı berýi kerek, – dedi aqyn.
SUHBATTAN TÝǴAN ÚLKEN SHYǴARMALAR
Jıynda Qazaqstan Jazýshylar jáne Jýrnalıser odaqtarynyń múshesi, aqyn Dáýletbek Baıtursynuly suhbat janrynyń múmkindigi mol ekenine toqtaldy. Ázilhan Nurshaıyqovtyń «Aqıqat pen ańyz», Muhtar Shahanovtyń «Quz basyndaǵy ańshynyń zary» syndy belgili kitaptar suhbattan týyndaǵanyn mysal etti. Sondaı-aq tilshi qoǵamǵa aıtary bar tulǵany taýyp, onyń oıyn jurtshylyqqa jetkizýdiń ózi jýrnalısiń eńbegi ekenin sóz etti.
– Gazet pen jýrnaldyń abyroıyn bas redaktor kóterse, onyń sapasyn jýrnalıser qalyptastyrady. Bıfattyń suhbat alǵan keıipkerleri – ártúrli salanyń ókilderi. Aıtary bar adamdy tabýdyń ózi – jýrnalısiń myqtylyǵy, – dedi aqyn.
SHÁKİRT JETİSTİGİ – USTAZ MEREIİ
Tusaýkeserde fılologıa ǵylymdarynyń kandıdaty, qaýymdastyrylǵan profesor Aınur Kóshekova shákirtiniń jańa eńbegine ustazdyq baǵasyn berdi.
– «Syr suhbat – kóńil aınasy»... Kitap ataýynda tereń maǵyna bar. Syr – adamnyń ishki álemi, suhbat – sol álemge bastaıtyn jol, al kóńil aınasy – júrektegi shyndyqtyń kórinisi. Demek, bul kitap – adamdy tanýǵa, taǵdyrdy tyńdaýǵa, aqıqatty uǵynýǵa baǵyttalǵan. Jaqsy suhbat adamnyń bolmysyn ashyp qana qoımaı, oqyrmanǵa oı salyp, ómirge basqa qyrynan qaraýǵa jeteleıdi. Osy turǵydan alǵanda, jańa kitaptyń oqyrmanǵa bereri mol dep senemin, – dedi ǵalym.
Ádebı keshte qylqobyz sheberi Jasar Nurdanbek «Dospambettiń jyryn» oryndap, parodıst-akter Asqar Kómekbaev ónerimen kópshilikke kóterińki kóńil-kúı syılady.
«SUHBAT – JÁI ǴANA ÁŃGİME EMES...»
Jıyn sońynda tusaýy kesilgen týyndy avtory Bıfat Eltaeva kitaptyń jaryq kórýine úles qosqan azamattarǵa, ustazdarǵa, áriptesteri men keıipkerlerine alǵys bildirdi.
– Suhbat – suraq qoıyp, jáı ǵana áńgimelesý emes, aldymen keıipkerdi izdep, onyń qyzmeti men ómir jolyn zertteý. Sondaı-aq eńbek jolyndaǵy tańdaǵan salasyn tereń túsiný kerek. Sodan keıin ǵana mazmundy áńgime qurýǵa múmkindik týady, – dedi avtor.
Rýhanı keshke aınalǵan tusaýkeser rásiminde áýezdi án shyrqalyp, kúmbirlegen kúı oınady. Osylaısha qoǵamdyq sanaǵa qozǵaý salatyn «Syr-suhbat – kóńil aınasy» kitaby qalyń oqyrmanǵa jol tartty. Baǵasyn patsha kóńildi oqyrman baǵamdaı jatar...
«Abai University» medıa ortalyǵy
