Búgin aımaq bashysy Berik Ýálıdiń tóraǵalyǵymen Memleket basshysy Qasym-Jomart Toqaevtyń Qazaqstan halqyna arnaǵan «Jańa tarıhı kezeńdegi Qazaqstannyń ózekti mindetteri» atty Joldaýyn talqylaýǵa arnalǵan oblys aktıviniń otyrysy ótti. Jıynǵa oblystyq basqarmalardyń basshylary, qoǵamdyq keńes músheleri, saıası partıa fılıaldary ókilderi, quqyq qorǵaý organdary men departamentterdiń basshylary qatysty. Qala-aýdan ákimderi beıne rejım arqyly qosyldy.
Oblys ákimi Prezıdent Joldaýynda aıqyndalǵan negizgi basymdyqtarǵa toqtalyp, óńirdiń áleýmettik-ekonomıkalyq damýy úshin mańyzyn atap ótti.
«Prezıdenttiń Joldaýy – elimizdiń aldaǵy damý baǵdaryn aıqyndaıtyn, memlekettik saıasattyń negizgi basymdyqtaryn naqtylaıtyn mańyzdy strategıalyq qujat. Memleket basshysy Qasym-Jomart Kemeluly Toqaev Joldaýynda: «Qazaqstan aýqymdy qurylys alańyna aınalýǵa tıis», – dep atap ótti. Prezıdent aıqyndaǵan bul basymdyqtar jańadan qurylǵan Abaı oblysy úshin aıryqsha mańyzdy. Óńirdiń ornyqty damýyn qamtamasyz etý, turǵyndardyń turmys sapasyn jaqsartý jáne eldi mekenderdiń ınfraqurylymyn jańǵyrtý – aldymyzda turǵan negizgi mindetter. Joldaýda belgilengen mindetterdi oryndaý – óńirdiń bolashaǵyna, turǵyndarymyzdyń ál-aýqatyna jáne memleketimizdiń damýyna qosylǵan naqty úles», – dedi Berik Ýálı.
Aımaq basshysy Prezıdent kótergen «Halyqtyq qurylys» bastamasynyń óńir úshin erekshe mańyzǵa ıe ekenin aıtty. Qazirgi ýaqytta oblysta «Aıagóz – Baqty» temirjol jelisi, Semeı qalasyndaǵy jańa tórt jolaqty kópir, Aqtoǵaı mys balqytý zaýyty men et óńdeý kesheni sıaqty iri jobalar júzege asyrylyp jatyr. Sonymen qatar búdjet qarajaty esebinen jalpy quny 35 mlrd teńgeni quraıtyn 28 áleýmettik nysanda qurylys jáne jóndeý jumystary júrgizilýde.
Memleket basshysynyń qoldaýymen qolǵa alynǵan «Abaıǵa qurmet» aksıasy aıasynda Semeı qalasynda shyǵarmashylyq ortalyǵy, medıa ortalyq, dene shynyqtyrý-saýyqtyrý kesheni, ınklúzıvti sport kesheni, ústel tenısi ortalyǵy, Jekpe-jek saraıy jáne Dostyq úıi salynyp jatyr. Oblys ortalyǵynda alǵash ret BINOM mektebiniń qurylysy bastaldy. Aldaǵy jyldary óńirde jańa teatr, oblystyq aýrýhana jáne balalar aýrýhanasyn salý josparlanǵan.
Jıynda kólik-logıstıka ınfraqurylymyn damytý máselesine erekshe nazar aýdaryldy. Toǵyz joldyń torabynda ornalasqan óńirimiz úshin jol máselesiniń mańyzy erekshe. Bul baǵytta birqatar jumys atqaryldy. Byltyr halyqty kópten beri tolǵandyrǵan «Omby – Maıqapshaǵaı» baǵytyndaǵy avtomobıl joly jóndelip, paıdalanýǵa berildi. Semeı qalasynda 100 kósheni asfálttaý jumystary qolǵa alyndy. Bul buryn asfált tóselmegen kóshelerdiń jol sapasyn jaqsartýǵa múmkindik beretin mańyzdy qadam. Sonymen qatar ótken jyly eki kópirdiń asfált jabyny jańartyldy. Aldaǵy ýaqytta Semeı qalasyndaǵy Shýgaev pen Sátbaev kósheleriniń qıylysynda jol aıryǵy salynyp, Ertis ózeni arqyly ótetin aspaly kópir kúrdeli jóndeýden ótedi.
Oblys ákimi «Aıagóz – Baqty» temirjolynyń strategıalyq mańyzyn atap ótip, onyń qurylysyn turaqty baqylaýda ustaý qajettigin atap ótti. Sondaı-aq, oblystyq jáne aýdandyq mańyzy bar avtomobıl joldarynyń sapasyn jaqsartý, eldi mekender arasyndaǵy kólik qatynasyn qamtamasyz etý mindetterine toqtaldy.
Aýyl sharýashylyǵy salasynda 2026-2028 jyldarǵa arnalǵan jol kartasy aıasynda jalpy quny 112,5 mlrd teńgeni quraıtyn 19 ınvestısıalyq jobany júzege asyrý kózdelgen. Aımaq basshysy aýyl sharýashylyǵy ónimderin tereń óńdeýdi damytý, jergilikti shıkizatty tıimdi paıdalaný, sýarmaly jerlerdiń kólemin ulǵaıtý jáne sý únemdeý tehnologıalaryn engizý qajettigine toqtaldy.
Óńirde ınvestısıa tartý jumysy jalǵasýda. Bıyl toǵyz aıda oblys ekonomıkasyna 417,7 mlrd teńge ınvestısıa tartyldy. Onyń 365,2 mlrd teńgesi jeke ınvestısıalardyń úlesine tıesili. Jaqynda ótken óńirlik úılestirý keńesinde jalpy quny 19,2 mlrd teńgeni quraıtyn, 443 jańa jumys ornyn ashýdy kózdeıtin 12 ınvestısıalyq joba maquldandy.
Densaýlyq saqtaý salasynda «Aýyldyq densaýlyq saqtaýdy jańǵyrtý» ulttyq jobasy aıasynda óńirde 65 alǵashqy medısınalyq-sanıtarıalyq kómek nysany salyndy. Aýdandyq aýrýhanalardyń materıaldyq-tehnıkalyq bazasy nyǵaıtylyp, jańa medısınalyq bólimsheler ashyldy. Oblystyń densaýlyq saqtaý uıymdaryna, aýdandyq aýrýhanalarǵa 100 jańa jedel járdem kólikteri tabystalyp jatyr.
Jıyn qorytyndysynda oblys ákimi orynbasarlaryna, basqarma basshylaryna, qala jáne aýdan ákimderine Prezıdent Joldaýyndaǵy basymdyqtardy óz salalary boıynsha pysyqtap, josparlanǵan jobalardyń sapaly ári ýaqtyly oryndalýyn qamtamasyz etýdi tapsyrdy. Ekonomıka jáne búdjettik josparlaý basqarmasyna áleýmettik nysandar men ınjenerlik ınfraqurylymǵa degen qajettilikti taldap, basym jobalardyń tizimin ázirleýdi, Jolaýshylar kóligi jáne avtomobıl joldary basqarmasyna jóndeýdi qajet etetin jol ýchaskelerin anyqtap, jumys sapasyna baqylaýdy kúsheıtýdi júktedi.
Sonymen qatar otyrysta Abaı oblysy ardagerler keńesiniń tóraǵasy Muratqazy Alın, oblystyq qoǵamdyq keńestiń tóraǵasy Meıramhat Aınabekov, qoǵamdyq keńes múshesi Nıkolaı Isaev jáne Qazaqstan Halyq Keńesiniń múshesi Dýman Orynbekov sóz sóıledi.
