Abaı oblysynda mádenıet, tilderdi damytý jáne arhıv isi salalarynda birqatar jumystar atqarylýda. Jyl basynan beri óńirde 4 954 mádenı is-shara ótkizildi. Bul týraly Óńirlik komýnıkasıalar qyzmetiniń kóshpeli baspasóz máslıhatynda Abaı oblysynyń mádenıet, tilderdi damytý jáne arhıv isi basqarmasynyń basshysy Janjigit Omarhan baıandady.
Búginde oblysta mádenıet, tilderdi damytý jáne arhıv isi salasynda 299 nysan jumys isteıdi. Onyń ishinde 137 kitaphana, 132 klýb pen mádenıet úıi, 10 mýzeı jáne 9 arhıv bar.
Mádenıet úıleri men klýbtarda ótkizilgen is-sharalarǵa 386 myńnan astam adam qatysty. Sonymen qatar 468 úıirmege 6 993 adam qatysady, «Halyqtyq» ataǵy bar 59 shyǵarmashylyq ujym jumys isteıdi.
– Abaı atyndaǵy teatrdyń úsh shyǵarmashylyq trýppasynda 103 ártis eńbek etedi. Bıyl qazaq mýzykalyq-drama trýppasy 8 jas aktermen tolyqty. Teatrda 195 spektákl kórsetilip, olardy 46 myńnan astam kórermen tamashalady, – dedi Janjigit Omarhan.
Ámire Qashaýbaev atyndaǵy memlekettik fılarmonıada 111 konsert ótkizilip, 21 myńnan astam kórermen qamtyldy. «Abaı eli – óner kenishi» oblystyq baıqaýyna 10 aýdannan 2 myńǵa jýyq ónerpaz qatysty. Al «Alakól alaýlary – 2026» festıvaliniń konserttik baǵdarlamalaryn 75 myń kórermen tamashalady.
Mýzeılerdiń qorynda 178 myńnan astam qundylyq saqtaýly, onyń 43 myńnan astamy sıfrlandyrylǵan. Mýzeılerde 851 is-shara ótkizilip, 76 myńnan astam kelýshi qabyldandy. Sonymen qatar 13 jańa ekspozısıa jasalyp, 111 kórme uıymdastyryldy.
– Nevzorovtar otbasy atyndaǵy beıneleý óneri mýzeıi men F.M. Dostoevskııdiń ádebı-memorıaldyq mýzeıinde jóndeý jumystary qolǵa alyndy. Sonymen birge Dostoevskıı mýzeıiniń 55 jyldyǵyna arnalǵan halyqaralyq ǵylymı jáne mádenı is-sharalar ótkizildi, – dedi basqarma basshysy.
Kitaphana qorynda 2 mıllıonnan astam kitap bar, onyń 927 myńnan astamy memlekettik tildegi ádebıetter. Kitaphanalarda 4 621 is-shara ótkizilip, oǵan 130 myńnan astam adam qatysty. Turaqty oqyrmandar sany 123 myńnan asty.
«Qazaqstan halqyna» qoǵamdyq qorynyń qoldaýymen «Jana Klub» jobasy aıasynda 30 aýyldyq kitaphanany jańǵyrtý josparlanǵan. Birinshi kezeńge 15 kitaphana engizilip, alǵashqy jańartylǵan kitaphana Abaı aýdanynyń Qaraýyl aýylynda ashyldy.
– Bizdiń maqsatymyz aýyl kitaphanasyn balalar men jastar bilim alatyn, shyǵarmashylyqpen aınalysatyn, sıfrlyq múmkindikterdi paıdalanatyn jáne turǵyndar bas qosatyn zamanaýı qoǵamdyq keńistikke aınaldyrý, – dedi Janjigit Omarhan.
Memlekettik tildi damytý baǵytynda 167 túsindirý jumysy júrgizilip, 1 755 nysan qamtyldy. 140-tan astam zań buzýshylyq anyqtalyp, onyń 91-i talapqa saı retke keltirildi. Memlekettik organdardyń shyǵys qujat aınalymyndaǵy memlekettik tildiń úlesi 97,2 paıyzdy qurady.
Aǵymdaǵy oqý jylynyń birinshi kezeńinde 1 211 tyńdaýshy qazaq, aǵylshyn, orys jáne tatar tilderi boıynsha kýrstarǵa qatysyp, onyń 748-i qazaq tilin oqydy. Qysqa merzimdi tildik klýbtarda taǵy 181 adam bilim alyp, 386 tyńdaýshyǵa sertıfıkat berildi.
Arhıv salasynda 9 memlekettik arhıv jumys isteıdi. Esepti kezeńde arhıv qory 2 969 saqtaý birligine tolyqtyrylyp, 1 629 saqtaý birligi sıfrlandyryldy. Sıfrlanǵan qujattardyń jalpy kólemi 16 045 saqtaý birligine jetti.
Óńirde memlekettik tizilimge engizilgen 416 tarıh jáne mádenıet eskertkishi bar. Onyń 13-i respýblıkalyq mańyzy bar. Nevzorovtar otbasy atyndaǵy mýzeıdiń tarıhı ǵımaratynda eki jyldyq restavrasıa bastaldy, al V.G. Chernyshevskıı atyndaǵy №1 mektep ǵımaratyndaǵy jumystar aıaqtaldy.
Mádenıet ınfraqurylymy da jańartylýda. Besqaraǵaı aýdanyndaǵy Begen, Ernazar jáne Glýhovka aýyldarynda úsh mádenı nysan salynyp jatyr. Bıyl Úrjar aýdanynyń Joǵarǵy Eginsý jáne Aqsýat aýdanynyń Kókjyra aýyldarynda 100 oryndyq eki aýyldyq klýb paıdalanýǵa berildi.
