Qazaqstan Respýblıkasynyń Mádenıet jáne aqparat mınıstri Arman Qyryqbaev AQSH-tyń Qazaqstan Respýblıkasyndaǵy Tótenshe jáne Ókiletti Elshisi Djýlı Stafftpen kezdesti.
Taraptar Qazaqstan men AQSH-tyń mádenıet, mass-medıa jáne mýzeı isi salalaryndaǵy yntymaqtastyǵyn keńeıtý múmkindikterin talqylady.
Kezdesý barysynda Arman Qyryqbaev Qazaqstan Respýblıkasynyń Prezıdenti Qasym-Jomart Toqaev pen AQSH Prezıdenti Donald Tramp arasyndaǵy qarym-qatynastyń joǵary deńgeıde ekenin erekshe atap ótti. Mınıstr eki el basshylarynyń keńeıtilgen strategıalyq áriptestikti nyǵaıtýda jáne ekijaqty yntymaqtastyqty damytýda sheshýshi ról atqaratynyn aıtty.
Óz kezeginde Djýlı Stafft Qazaqstan Prezıdentiniń aldaǵy G20 samıtine qatysýyna daıyndyq jumystary qarqyndy júrip jatqanyn oń baǵalady. Memleket basshysy 14-15 jeltoqsanda Maıamıde ótetin samıtke AQSH Prezıdenti Donald Tramptyń shaqyrýymen qatysady. Elshi aldaǵy samıttiń Qazaqstan men AQSH arasyndaǵy qarym-qatynasty odan ári tereńdetip, túrli baǵyttaǵy yntymaqtastyqty keńeıtý úshin mańyzdy ekenin atap ótti.
Elshiniń ótinishi boıynsha mınıstr Quryltaıda qaralyp jatqan onlaın-platformalar men mass-medıa salasyndaǵy zańnamalyq túzetýler týraly aqparat berdi. Usynylǵan ózgerister azamattardyń quqyqtaryn qorǵaýǵa, balalardyń ınternettegi qaýipsizdigin qamtamasyz etýge, quqyqqa qaıshy kontenttiń taralýyna tosqaýyl qoıýǵa jáne onlaın-platformalardyń jaýapkershiligin arttyrýǵa baǵyttalǵan. Osy oraıda Qazaqstannyń sıfrlyq ortany retteý jónindegi halyqaralyq tájirıbeni, sonyń ishinde AQSH tájirıbesin zerdeleýge múddeli ekeni aıtyldy.
Taraptar mýzeı salasyndaǵy yntymaqtastyqty damytýǵa da erekshe nazar aýdardy. Elshi Djýlı Stafft eki el mýzeıleri arasyndaǵy kásibı baılanysty nyǵaıtýdyń mańyzyn atap ótti. Sondaı-aq birlesken bastamalardy júzege asyrýǵa, sonyń ishinde Qazaqstan mýzeıleriniń jádigerlerin AQSH-ta kórmege qoıýǵa qoldaý kórsetýge daıyn ekenin bildirdi.
Arman Qyryqbaev amerıkalyq mýzeılerdiń tájirıbesin zerdeleýge, mýzeı isindegi zamanaýı tásildermen tanysýǵa jáne jańa kásibı baılanystar ornatýǵa múmkindik beretin bastamasy úshin elshige alǵys aıtty.
Kezdesý qorytyndysynda taraptar mádenı-gýmanıtarlyq baılanystardy odan ári nyǵaıtýǵa jáne birlesken jobalardy júzege asyrýǵa múddeli ekenin rastady.