«Oıan, qazaq» jobasynyń avtorlary kórermen nazaryna «Qara altyn» dep atalatyn jańa tyń týyndy usynyp otyr. Atalǵan kórkem fılm búginnen bastap elimizdiń barlyq kınoteatrlarynda kórsetilmek.
Týyndynyń prodúseri Aısáýle Ábilda buǵan deıin bergen suhbatynda kartınanyń basty ıdeıasy men mazmunyna keńinen toqtalǵan edi. Onyń aıtýynsha, bul týyndy ońaı jolmen baıyp ketýdiń jolyn kórsetetin fılm emes. Kerisinshe, qıyndyqqa moıymaıtyn qaısarlyq pen qajymas jigerdi beıneleıdi.
Fılmniń sújet jelisi kórermendi ózine baýrap alady. Basty keıipker – Qasym Isaǵalıev ár qadamyn aldyn ala muqıat esepteıtin, sýyqqandy ári ıntellektýal kásipker. Atalǵan fılm týraly alǵashqy kúnnen bastap qalyń jurtshylyq jaǵymdy pikirler jazdy.
Kıno týyndysy týraly zıaly qaýym ókilderi men belgili tulǵalar da óz oılaryn ortaǵa saldy.
Aıgúl Ismakova óziniń facebook paraqshasynda fılmniń ıdeıalyq tereńdigine toqtalyp, týyndyda Shákárim Qudaıberdiuly urpaǵynyń óz kásibin qorǵaý jolyndaǵy kúresi nanymdy kórinis tapqanyn aıtady. Onyń sózinshe, munda adamnyń jany men tán talasy, ar men uıattan attamaǵandar men adamdyqty belsheden basqandardyń arpalysy óte sheber beınelengen. "Bul – búgingi otanshyl ár azamat kóretin fılm", – dep baǵa berdi ol.
Al belgili jýrnalıs, «Qazaqstan» teleradıokorparasıasynyń Almatydaǵy medıaortalyǵynyń basshysy Erqanat Kópjasaruly fılmniń dramatýrgıalyq qýatyn erekshe atap ótti. Ol kartınanyń shynaıy oqıǵaǵa negizdelgenin atap ótip, týyndyda bılik búrokratıasy, reıderlik, olıgopolıa jáne sot júıesi sıaqty kúrdeli máseleler ashyq sýrettelgenin jazdy. Tipti kórermendi oılandyryp, eldegi iri óndiristik oryndar men júıe tabıǵaty týraly úlken suraqtarǵa jaýap izdeýge ıtermeleıtinin jetkizdi. Onyń pikirinshe, fılm adam boıyndaǵy kúreskerlik qabiletti oıatyp, eńse tikteýge dem beredi.
Sondaı-aq aqyn, jýrnalıs Ularbek Nurǵalymuly da fılm týraly jyly lebizin bildirdi. Ol kórermendi arzan dúnıemen aldamaı-aq, shynaıy óner arqyly baýrap alýǵa bolatynyn bul fılm tolyq dáleldegenin aıtyp, «Baryńyzdar, kórseńizder bolady» dep kópshilikti kınoteatrlarǵa shaqyrdy.
Alǵashqy kórsetilimnen-aq kórermenniń ystyq yqylasyna bólengen «Qara altyn» týyndysy otandyq kıno ónerindegi sapaly ári salmaqty jobalardyń birine aınalary sózsiz.
