Qonaev qalasynyń óneri halyqaralyq arenada bıikten kórindi. Belarýs Respýblıkasynyń Vıtebsk qalasynda 14–20 shilde aralyǵynda ótken «Slaván bazary – Vıtebsk-2026» halyqaralyq estradalyq án oryndaýshylar baıqaýynda Qonaev qalalyq mádenıet úıiniń ánshisi Aqerke Amalát İ orynǵa ıe boldy.

Osy aıtýly jeńiske oraı Qonaev qalasynyń ákimi Asqat Berdihanov ónerpazdy arnaıy qabyldap, Alǵys hat pen 1 mıllıon teńgeniń sertıfıkatyn tabystady.

«„Slaván bazary“ – álemdik deńgeıdegi bedeldi óner baıqaýlarynyń biri. Bıyl 19 memlekettiń talanttary baq synaǵan dodada sizdiń jeńiske jetýińiz – tek jeke jetistik emes, bul Qonaev qalasynyń mádenı áleýetiniń, qazaq óneriniń bıik deńgeıin álemge tanytqan úlken jeńis. Barsha qala turǵyndarynyń atynan sizge alǵysymdy bildiremin. Alar asýyńyz bıik, óner jolyńyz árdaıym jarqyn bolsyn! Sizge zor densaýlyq, sarqylmas shabyt jáne jańa jeńister tileımin!» – dedi shahar basshysy.

Saltanatty kezdesýde ánshini qoldaǵan demeýshi, Qonaev qalalyq Qoǵamdyq keńesiniń tóraǵasy Sergeı Goránoı da quttyqtap, izgi tilegin jetkizdi.

Óz kezeginde Aqerkeniń anasy Gúlnur Zulqarshynqyzy qyzynyń jetistigine qýanyp, qoldaý kórsetken Qonaev jurtshylyǵyna alǵysyn bildirdi. Kezdesý sońynda ol qala ákimine óziniń tól týyndysyn tartý etip, rızashylyǵyn jetkizdi.