Astanada «Senimen Bolashaq» respýblıkalyq qoǵamdyq birlestiginiń qurylǵanyna bes jyl tolýyna oraı uıymdastyrylǵan «Tektiler tý kóteredi» respýblıkalyq jýrnalıser baıqaýynyń jeńimpazdaryn marapattaý rásimi ótti.

Saltanatty jıynǵa birlestiktiń quryltaıshysy, joba avtory Nurken Asanov, Qazaqstan Respýblıkasy Ulttyq ǵylym akademıasynyń akademıgi, fılologıa ǵylymdarynyń doktory, profesor Dıhan Qamzabekuly, qoǵam qaıratkeri Orazkúl Asanǵazyqyzy, Qazaqstannyń Azamattyq alánsynyń prezıdenti Baný Nurǵazıeva, zıaly qaýym ókilderi men buqaralyq aqparat quraldarynyń qyzmetkerleri qatysty.

Jıynda sóz sóılegen Nurken Asanov qazirgi kúrdeli geosaıası jaǵdaıda qoǵamnyń birligi men ulttyq qundylyqtardy saqtaý máselesiniń ózektiligine toqtaldy. Onyń aıtýynsha, eldiń beıbit ómiri men turaqtylyǵyn baǵalaı otyryp, azamattyq qoǵamdy nyǵaıtý, adamı jáne ulttyq qundylyqtardy dáripteý – ortaq mindet.

– «Tektiler tý kóteredi» qaǵıdasy – eldik múdde, ult bolashaǵy men urpaq keleshegi jolyndaǵy aǵartýshylyqtyń urany. Qoǵamdy izgilikke, birlikke bastaıtyn azamattyq jaýapkershilikti kúsheıtýimiz qajet, – dedi Nurken Asanov.

Baıqaýǵa elimizdiń barlyq óńirinen 50-ge jýyq baspa, ınternet-basylym, radıo jáne telearna jýrnalıseri qatysyp, ulttyq tárbıe, qoǵamdyq sana, ortaq jaýapkershilik, rýhanı mura jáne azamattyq ustanym taqyryptaryndaǵy shyǵarmalaryn usyndy.

Qazylar alqasynyń sheshimimen tórt negizgi nomınasıa boıynsha jeńimpazdar anyqtaldy. «Baspa basylymyndaǵy úzdik maqala» atalymynda Ekibastuz qalalyq «Otarqa» gazetiniń bas redaktory Janargúl Qadyrova, «Internet-basylymdaǵy úzdik jarıalanym» atalymynda Baq.kz aqparat agenttiginiń tilshisi Maqpal Jumashova, «Respýblıkalyq baspa basylymyndaǵy úzdik maqala» nomınasıasynda «Egemen Qazaqstan» gazetiniń tilshisi Sándibek Prenov, al «Úzdik radıo nemese YouTube baǵdarlamasy» atalymynda «Shalqar» ulttyq radıoarnasynyń jýrnalısi Gúlnur Omarhanqyzy jeńimpaz atandy.

Arnaıy júldeler Qamshy.kz aqparat agenttigine, Pavlodar oblystyq «Ertis» jáne Qyzylorda oblystyq «Qyzylorda» telearnalaryna, «Munara» gazeti men KAZ365.kz ınternet-portalyna, «Jambyl-Taraz», «Ortalyq Qazaqstan» gazetterine, Kazinform halyqaralyq aqparat agenttigine, Dauletten.kz saıtyna, Prezıdent teleradıokesheniniń JIBEK JOLY radıosyna jáne Pavlodar oblystyq Halyq radıosyna tabystaldy.

«Senimen Bolashaq» respýblıkalyq qoǵamdyq birlestiginiń tóraǵasy Gúlshat Serikbekova baıqaýdyń negizgi maqsaty qoǵam ıgiligi úshin eńbek etip júrgen azamattardyń qyzmetin nasıhattaý ekenin aıtty.

– Tektilik – tek shyqqan tegine baılanysty uǵym emes. Ol – adal eńbek, elge qyzmet etý, azamattyq ustanym men jaýapkershilik. «Tektiler tý kóteredi» bastamasy qoǵamdyq máselelerdi sheshýge atsalysýǵa daıyn azamattardy ortaq maqsatqa biriktiredi, – dedi ol.

İs-shara barysynda sóz alǵan qatysýshylar ulttyq rýhty, azamattyq sanany jáne qoǵamdyq jaýapkershilikti qalyptastyrýda buqaralyq aqparat quraldarynyń orny aıryqsha ekenin atap ótti. Olar jýrnalısıkanyń qoǵamdaǵy oń ózgeristerge serpin beretin mańyzdy kúsh ekenin aıtyp, osyndaı shyǵarmashylyq baıqaýlar aldaǵy ýaqytta da jalǵasyn tabatynyn jetkizdi.