Atamura baspasynan Qazaqstannyń halyq ártisi, belgili teatr jáne kıno rejıseri, jazýshy Talǵat Temenovtiń «Mahabbat beketi» atty jańa kitaby jaryq kórdi. Almatydaǵy Qazaqstan Respýblıkasynyń Ulttyq kitaphanasynda ótken tusaýkeser rásimine zıaly qaýym ókilderi, belgili qalamgerler men mádenıet qaıratkerleri qatysty.

Ádebı basqosýdy qoǵam qaıratkeri, «Atamura» korporasıasy» JSHS prezıdenti Raqymǵalı Abraruly júrgizdi. Jıynǵa Qanseıit Ábdezuly, jazýshy Smaǵul Elýbaev, qalamger Kádirbek Segizbaıuly, aqyn Ulyqbek Esdáýlet, aqyn ári qoǵam qaıratkeri Qazybek Isa jáne basqa da tanymal tulǵalar qatysyp, avtordyń shyǵarmashylyq joly men jańa jınaǵy jóninde pikir bildirdi.

Kezdesýde kıno, ádebıet jáne mádenıet tóńireginde áńgime órbip, Talǵat Temenovtiń ónerdegi ózindik qoltańbasy sóz boldy. Teatr men kıno salasynda kórermenniń yqylasyna bólengen rejıserdiń ádebı shyǵarmashylyǵy da oqyrmanǵa oı salyp, adam janynyń tereń qatparlaryn tanýǵa múmkindik beredi.

«Mahabbat beketi» jınaǵyna «Gúlnaz», «Kóktem shyqsa, kókek keler» povesteri jáne «Lıbertı», «Papasynyń qyzy», «Kóke bala» atty áńgimeleri engen. Avtor týyndylarynda adam taǵdyry, mahabbat pen saǵynysh, sezim tazalyǵy jáne ómirdiń san túrli synaǵy kórkem beınelenedi.

Talǵat Temenovtiń shyǵarmashylyǵyna tán erekshelik – adam bolmysyn, onyń ishki qaıshylyǵy men sezim álemin nanymdy sýretteý. Kıno arqyly kórermenge jol tapqan mahabbat taqyryby jańa jınaqta kórkem sózben órilip, oqyrmanǵa basqa qyrynan usynylyp otyr.

Kitaptyń tusaýkeseri barysynda qalamgerdiń shyǵarmashylyǵyna joǵary baǵa berilip, jańa týyndynyń oqyrmanǵa bereri mol ekeni atap ótildi. «Mahabbat beketi» oqyrmandy júrek qalaýy, adamdyq qarym-qatynas pen ómirdiń máni týraly tolǵandyratyn shyǵarma retinde ádebı ortaǵa jol tartty.

Jańa kitaptyń jaryq kórýi Talǵat Temenovtiń shyǵarmashylyq murasyn keńinen tanytýǵa jáne oqyrmannyń kórkem ádebıetke degen qyzyǵýshylyǵyn arttyrýǵa úles qosady degen senim bar.