Almatyda Ahmet Baıtursynuly atyndaǵy «Qazaq tiliniń úzdik oqytýshysy» qalalyq konkýrsy jarıalandy

    Bıfat Eltaeva
    Almatyda Ahmet Baıtursynuly atyndaǵy «Qazaq tiliniń úzdik oqytýshysy» qalalyq konkýrsy jarıalandy foto: Avtor

    Almaty qalasynda Ahmet Baıtursynuly atyndaǵy «Qazaq tiliniń úzdik oqytýshysy» qalalyq konkýrsyna ótinimder qabyldaý bastaldy.
    Konkýrs «Halyqaralyq «Qazaq tili» qoǵamy» qoǵamdyq birlestiginiń Almaty qalalyq fılıalynyń uıymdastyrýymen ótkiziledi. Búginde memlekettik tildi meńgerýge degen suranys eńbektegen baladan eńkeıgen qartqa deıin artyp otyr, sondyqtan bilikti oqytýshy kadrlardy qoldaý, olardyń kásibı sheberligi men shyǵarmashylyǵyn shyńdaý asa ózekti.
    Konkýrstyń maqsaty – qazaq tilin oqytýshylardyń (muǵalimderdiń) kásibı biliktiligin arttyrý, ádistemelik sheberligin shyńdaý, shyǵarmashylyq jumystarmen aınalysýyna múmkindik jasaý jáne úzdik tájirıbeni nasıhattaý.
    Konkýrsqa barlyq deńgeıdegi qazaq tili oqytýshylary qatysa alady: eresekterge til úıretetin mamandar, joǵary oqý oryndary men arnaıy orta bilim berý uıymdarynyń oqytýshylary, orta jáne bastaýysh mektep muǵalimderi, sondaı-aq balabaqsha pedagogteri.
    Qatysýshylar konkýrsqa mynadaı ónimderin usyna alady:
    1.    Avtorlyq oqý baǵdarlamalary – qazaq tilin oqytýdaǵy ózindik júıe men tyń tásilder.
    2.    Ádistemelik keshender – sabaq ótkizýge arnalǵan júıeli oqý-ádistemelik materıaldar.
    3.    Oqý quraldary jáne ózge de ádistemelik ónimder – til úırenýshilerge arnalǵan basylymdar men ázirlemeler.
    Usynylǵan jumystardy belgili pedagogter, ádisker ǵalymdar, qoǵamdyq uıymdardyń ókilderi men qazaq tilin oqytýdyń kásibı bilikti mamandarynan quralǵan qazylar alqasy baǵalaıdy. 
    Bas júlde, birinshi, ekinshi jáne úshinshi oryn ıegerlerine tıisti dárejedegi dıplomdar men baǵaly syılyqtar, qatysýshylarǵa alǵys hattar men estelik syılyqtar tabystalady.
    Atalǵan is-shara memlekettik til saıasatyn nasıhattaýǵa, qazaq tili oqytýshylarynyń qoǵamdyq mártebesi men bedelin arttyrýǵa jáne qazaq tilin úıretý isiniń sapasyn kóterýge baǵyttalǵan. Konkýrs  barysynda oqytýshylar áriptesterimen tájirıbe almasyp, túrli ádistemelermen tanysýǵa múmkindik alady.
    Ótinimderdi qabyldaý merzimi: 2026 jyldyń 25 qarashasyna deıin
    Ótinim berý: https://forms.gle/kC2suLywtWL1Vxue7 siltemesi boıynsha Google formany toltyrý arqyly.
    Jeńimpazdardy marapattaý rásiminiń ótetin kúni: 2026 jylǵy 9 jeltoqsan.
    Ótetin orny: Almaty qalasy, Tóle bı kóshesi, 86, akt zaly.
    Elektrondyq poshta: kazqogam.competition@gmail.com  
    Baılanys telefony: +7 701 664 2721.

    Qatysty Maqalalar