Almaty oblysynda otbasylyq dástúrdi dáriptep, balalaryn ózara qurmet pen qoldaý negizinde tárbıelep, urpaqtan urpaqqa jalǵasqan qundylyqtardy kózdiń qarashyǵyndaı saqtap kele jatqan januıalarǵa qurmet kórsetildi. «Mereıli otbasy» ulttyq baıqaýynyń oblystyq kezeńi jeńimpazdaryn marapattaý rásiminde óńirdiń tańdaýly 12 otbasy kópshilikke tanystyryldy.

Bıyl baıqaýǵa oblystyń barlyq aýdandary men qalalarynan 146 otbasy ótinish bergen. Oblystyq kezeńniń qorytyndysy boıynsha úzdik dep tanylǵan 12 januıa saltanatty sharaǵa shaqyryldy. Olardyń toǵyzy yntalandyrý syılyqtarymen qatar, 150 myń teńgeden aqshalaı júldege ıe boldy.

Marapattalǵandar qatarynda Ermakashevter, Týıýtovtar, Pırmýhamedovter, Ahmetovter, Bekmuhanovtar, Júnisovter, Qýandykovtar, Sátbek jáne Qýandyq otbasylary bar.

Al júldeli oryndar bylaısha bólindi. Birinshi oryn Kegen aýdanynan kelgen Baqashovtar áýletine buıyryp, 1 mıllıon teńgeniń aqshalaı syılyǵy tabystaldy. Ekinshi oryndy Jambyl aýdanynan shyqqan Asqarovtar otbasy ıelenip, 500 myń teńgege ıe boldy. Úshinshi oryn İle aýdanynan kelgen Tinibaevtar januıasyna berilip, 300 myń teńge kólemindegi júldemen marapattaldy. Sonymen qatar barlyq qatysýshylardyń balalaryna oıynshyqtar syıǵa tartyldy.

Jeńimpazdardy quttyqtaǵan Almaty oblysy ákiminiń orynbasary Ǵanı Maılybaev otbasylyq qundylyqtardyń óskeleń urpaq tárbıesindegi mańyzyna toqtaldy.

– Halqymyzda «Otan otbasynan bastalady» degen taǵylymdy sóz bar. Bul baıqaý januıalardyń berekesi men birligin ǵana emes, qoǵamnyń rýhanı-adamgershilik negizderiniń nyǵaıa túskenin de kórsetedi. Memleket basshysy «Baqytty ári berik otbasy – baqýatty qoǵam men memlekettiń myzǵymas tiregi» dep atap ótken bolatyn. Adamǵa eń jaqyn jandardyń ónegesi arqyly patrıotızm, jaýapkershilik, qurmet, eńbekqorlyq pen jasampazdyqqa umtylý sekildi qasıetter bala boıyna eń aldymen otbasynda sińedi, – dedi Ǵanı Maılybaev.

Ol baıqaýǵa atsalysqan barsha januıalarǵa rızashylyǵyn bildirip, olardyń bala tárbıesine, ulttyq dástúrlerdi dáripteýge jáne otbasy qundylyqtaryn nyǵaıtýǵa qosyp júrgen úlesin atap ótti. Oblys ákiminiń orynbasarynyń aıtýynsha, óńirde kópshilikke syıly, keıingi býynǵa ónege bolarlyq otbasylar az emes.

Kópshiliktiń esinde erekshe qalǵan sátterdiń biri – birinshi oryn ıelengen Baqashovtar otbasynyń ájesiniń sahnadaǵy sózi boldy.

– Biz Han Táńirindeı asqaq shyńy bar, Sharyn shatqaly jaıqalyp jatqan kórikti ólkeden keldik. Iaǵnı, qasıetti Kegen jerinen at terletip jettik, – dedi ol.

Áje uıymdastyrýshylarǵa alǵysyn aıtyp, týǵan jeri Kegen aýdany týraly jyly lebizin bildirdi. Kópshilikke óz shyǵarmasynan óleń oqyp, erekshe áser qaldyrdy.

Kesh sońynda merekelik konserttik baǵdarlama usynyldy. Saltanatty shara otbasy berekesin saqtap, bala tárbıesine jaýapkershilikpen qarap, úlkenge qurmet kórsetip júrgen januıalarǵa alǵys bildirip, olardyń qoǵamdaǵy orny men ónegesin taǵy bir márte aıshyqtady.