Ál-Farabı atyndaǵy Qazaq ulttyq ýnıversıtetiniń Jýrnalısıka fakúltetinde qyzmet etetin birneshe oqytýshylardyń jumystan ketýi týraly aqparat áleýmettik jelide qyzý talqyǵa tústi. Qoǵamda rezonans týdyrǵan bul jaǵdaıǵa baılanysty joǵary oqý ornynyń basshylyǵy resmı pozısıasyn bildirdi.
Áńgime belgili aqyn, baspager ári atalǵan fakúltettiń burynǵy dekany Temirǵalı Kópbaıdyń Facebook-tegi jazbasynan bastaldy. Onyń aıtýynsha, fakúltette kóptegen jyldar boıy eńbek etken tórt tájirıbeli maman – fılologıa ǵylymdarynyń doktory Káken Qamzın, aqyn Murat Shaımaran, satırık jazýshy Ermahan Shaıhy jáne onyń ózi qyzmetten bosatylǵan.
Temirǵalı Kópbaı bul sheshimdi kadrlyq ádiletsizdik retinde baǵalap, oqytýshylardyń fakúltettegi basqarý saıasatyna kelispeýshilik bildirgenin aıtqan.
Onyń pikirinshe, kópjyldyq tájirıbesi bar profesor-oqytýshylar quramynyń ketýi bilim ordasynyń bedeline keri áser etýi múmkin.
Aıta ketý kerek, buǵan deıin de jeli qoldanýshylary men stýdentter qaýymy aqyn Murat Shaımarannyń oqý ornynan ketýine baılanysty óz pikirlerin bildirgen bolatyn.
Ýnıversıtet basshylyǵynyń jaýaby: Barlyǵy zań aıasynda
Áleýmettik jelide taraǵan pikirlerge qatysty QazUÝ Basqarma múshesi – Akademıalyq máseleler boıynsha prorektor Alına Galeeva resmı túsinikteme berdi. Rektorat ókiliniń sózinshe, kadrlyq ózgerister joǵary oqý oryndaryna ortaq standartty konkýrs rásimderine saı júrgizilgen.
Ýnıversıtet usynǵan aqparatqa sáıkes:
- Káken Hamzın men Temirǵalı Kópbaevtyń eńbek shartynyń merzimi aıaqtalǵan;
- Ermahan Shaıhy akademıalyq biliktilikti anyqtaý baıqaýyna qatysýdan bas tartyp, tıisti prosedýradan ótpegen;
- Murat Shaımaran bekitilgen akademıalyq talaptar boıynsha konkýrstyq irikteýden óte almaǵan.
"Laýazymǵa qabyldaý rásimi joǵary oqý oryndarynda belgilengen tártipke sáıkes jyl saıyn júrgiziledi. Arnaıy qurylǵan konkýrstyq komısıa ótinish berýshilerdiń ǵylymı jáne oqý-ádistemelik eńbekterin, pedagogıkalyq tájirıbesi men dáris berý biliktiligin baǵalaıdy. Barlyq sheshimder qoldanystaǵy zańnamaǵa jáne ýnıversıtettiń ishki normatıvtik qujattaryna tolyq saı keledi", – dep atap ótti Alına Galeeva.
Osylaısha, ýnıversıtet tarapy bul jaǵdaıdy saıası nemese jeke arazdyq emes, jyl saıyn ótetin josparly attestasıa men zańdy konkýrs nátıjesi dep túsindirdi.
