Almaty oblysynda áleýetti ınvestorlarmen kólik-logıstıkalyq hab salý, óndiris oryndaryn ashý jáne «Sokol» sporttyq-tehnıkalyq keshenin damytý máseleleri talqylandy.

Almaty oblysynyń ákimi Shyńǵys Árinov İle aýdanynda ornalasqan «Sokol» sporttyq-tehnıkalyq keshenine baryp, Qytaı Halyq Respýblıkasynyń delegasıasymen kelissóz júrgizdi.

Delegasıany Qytaıdyń Szánsý provınsıasyna qarasty Nankın qalasy Súaný aýdany Halyq úkimetiniń basshysy Týn Sáoszá (Tong Xiaojia) bastap keldi. Onyń quramynda memlekettik organdardyń, bıznes ókilderiniń jáne Shanhaı yntymaqtastyq uıymy Energetıkalyq ortalyǵynyń ókilderi boldy.

Kezdesýge «Sokol» sporttyq-tehnıkalyq kesheniniń bas dırektory Dastan Ibragımov ta qatysty.

Kelissóz barysynda sheteldik seriktester «Sokol» kesheniniń basshylyǵymen birlesip, Almaty oblysynda birqatar ınvestısıalyq jobany júzege asyrýǵa qyzyǵýshylyq tanytty.

Atap aıtqanda, qala qurylysy jobalary, iri jáne shaǵyn óndiris oryndaryn ashý, sondaı-aq kólik-logıstıkalyq hab salý máseleleri talqylandy.

Óz kezeginde Almaty oblysynyń ákimi Shyńǵys Árinov óńirdiń naqty ınvestısıalyq usynystar men uzaq merzimdi iskerlik yntymaqtastyqqa ashyq ekenin atap ótti.

Oblys basshysynyń aıtýynsha, óńirde ınvestorlardy iri nemese shaǵyn dep bólmeıdi. Eń bastysy, naqty atqarylǵan jumys, tartylǵan ınvestısıa kólemi jáne júzege asyrylǵan jobalardyń nátıjesi.

Sondaı-aq ol oblystyń aýqymdy ınvestısıalyq bastamalarmen qatar shaǵyn jáne orta bıznesti damytýǵa da múddeli ekenin jetkizdi.

Kezdesýde «Sokol» sporttyq-tehnıkalyq kesheniniń damý perspektıvalary men onyń birlesken ınvestısıalyq jobalarǵa qatysý múmkindikterine erekshe nazar aýdaryldy.

Taraptar aldaǵy yntymaqtastyqtyń negizgi baǵyttaryn talqylady.