Halyq qalaýlysy bolýǵa nıettiler totydaı taranyp, suńqardaı sylanyp saılaý aldy 

naýqanǵa bilek sybana kirisip ketken syńaıly. Asyly , halyq qalaýy ma , joq basqanyń tańdaýy ma, ony ózderiniń arlaryna salaıyq. 

Saılaý bolǵasyn barlyǵy zań aıasynda shynydaı taza , múltiksiz oryndalýy mindet. 

Biraq Jezqazǵan qalalyq saılaý okrýginiń aınalasynda óte kúmándi másele júrip jatqan sekildi. 
Jezqazǵan qalasy boıynsha jalpy sany 13 - saılaý okrýginiń árqaısysynda nebári eki kandıdattan tirkelgen. Keıbir okrýgterde bir mekemeniń basshysy óziniń qolasty qyzmetkerimen dodaǵa tússe,  basqasynda bloger men onyń mobılografy bir okrýgte bolýy tań qaldyrady ?   Bul básekelestiktiń qanshalyqty deńgeıde ekenin kórsetip tur. 
Asa nazar aýdaratyn jaıt,   ákimshilik saıtynda bastapqyda  atalǵan  kandıdattardyń resmı jumys oryndary kórsetilse, araǵa kún salmaı  aıaq astynan "jumyssyz" bolyp ózgertile salǵan. Bul sonda kandıdattar qyzmettes emes dep halyqty jańylystyrý ma? Óz kezeginde bul derekter   basqa aqparat kózderimen sáıkes kelmeýine baılanysty,  jeke málimetterdi burmalaý oryn alyp otyr dep esepteımiz. Saıası salmaǵy bar máselege  atalmysh kandıdattardyń ózderi ne aıtary bar?  Ortalyq saılaý komısıasy nazaryna, atalǵan resmı aqparat saılaýshylar tańdaýyna yqpal etýi sebepti,   saılaý  nátıjesin zańsyz dep tanýǵa negiz bolýy múmkin ǵoı? 
 Osy oraıda  halyqtyń senimine ıe bolǵan, elge adal qyzmet etýdi maqsat tutqan azamattar qashan máslıhat tórinen oryn alady degen saýal týyndaıdy. 
«Saryarqa» qoǵamdyq birlestigi men táýelsiz kózqarastaǵy birqatar azamattardyń bul saılaýǵa qatysýdan bas tartýy bılikke oı saldy ma? Álde erkin oıdy odan ári tunshyqtyrý  negizgi maqsat pa edi? Shynynda suraq kóp. 

Keshegi AQSH-ta ótken saılaýdy kórip otyryp, eriksiz qyzyǵasyń, ishteı súısinesiń. Saıası báseke, ashyq tartys, halyqtyń tańdaýy degenniń qandaı bolatynyn kóresin. 

Bizge de ádil básekege negizdelgen, nátıjesine eshkim kúmán keltirmeıtin shynaıy saılaý buıyrar ma eken? Álde ádil saılaý ótkizý qazaq eliniń mańdaıyna jazylmaǵany ma?

Osyǵan baılanysty elimizdiń  Ortalyq saılaý komısıasynan, Bas  prokýrordan Jezqazǵan qalasyndaǵy barlyq 13 saılaý okrýginiń  kandıdattary men olardyń básekelesteri arasyndaǵy yqtımal qyzmettik, týystyq, iskerlik baılanystardy,  kandıdattardyń  jeke málimetteriniń  shynaılyǵyn, jeke derekterdi  jarıalaǵan resmı aqparat kózderin zań aıasynda jan-jaqty ári shuǵyl tekserýdi talap etemiz.

Tekseris nátıjeleri naqty derekter men dálelderge súıene otyryp, qoǵamǵa jarıa etilýi qajet.

Qurmetpen: «Saryarqa» qoǵamdyq birlestigi.