Abaı ýnıversıtetinde Memleket basshysy Qasym-Jomart Toqaevtyń tapsyrmasymen bekitilgen «Taza Qazaqstan» tujyrymdamasyn júzege asyrý baǵytynda arnaıy ótkizilgen ekologıalyq aptalyq óz jumysyn qorytyndylady. Aptalyqqa qara shańyraqtyń 10 myń erikti stýdenti qatysyp, qorshaǵan ortany qorǵaýǵa óz úlesterin qosty. Oǵan sheteldik bilim alýshylar da qatysty.
Memleket basshysy Qasym-Jomart Toqaev «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýynda «Qalalardyń qaýipsiz, jaıly, kórikti bolýyna basymdyq, ıaǵnı prıorıtet retinde qaraı otyryp, bul isti asa mańyzdy memlekettik mindet dep qabyldaý kerek. Bul – «Taza Qazaqstan» jalpyulttyq tujyrymdamasyna tolyq saı keletin talap» degen bolatyn. Osyndaı ıgi qundylyqtardy maqsat etken aptalyq óskeleń urpaqtyń boıynda patrıotızm men azamattyq jaýapkershilikti kúsheıtip, ekologıalyq mádenıetti qalyptastyrýdy kózdeıdi. Sondaı-aq stýdentterdi ortaq iske jumyldyryp, qoǵamdyq jumysta belsendi ári salaýatty ómir saltyn nasıhattaýda qulshynysty arttyrýǵa shaqyrdy.
Aptalyqtyń jabylýyna İle Alataýy memlekettik tabıǵı ulttyq parkiniń aǵa memlekettik ınspektory Saltanat Amantaıqyzy arnaıy qatysyp, jastardyń ekologıalyq belsendiligin joǵary baǵalady. Ýnıversıtettiń Áleýmettik damý jónindegi prorektory Maqsat Jaqaý atalǵan jobanyń Jańa Konstıtýsıaǵa negizdelgenin, qaýipsiz, damyǵan jáne taza qoǵamdy qalyptastyrýǵa baǵyttalǵanyn alǵa tartty.
– «Taza Qazaqstan» aksıasy Prezıdentimizdiń bastamasymen jyl boıy júzege asyrylyp keledi. Eń aldymen bul naýqan aınalamyzǵa janashyrlyq tanytyp, tabıǵatty qurmetteýdi úıretedi. Aptalyq barlyq fakúltette uıymdastyrylyp, búgingi qorytyndysyna bes fakúltettiń bilim alýshylary jınaldy. Osyndaı bastamalar arqyly stýdentter ýnıversıtet qabyrǵasynda kásibı bilim ǵana emes, patrıottyq ustanym men jaýapkershiligin de qalyptastyrady, – dedi prorektor.
Respýblıka kúni merekesine baılanysty uıymdastyrylǵan ekologıalyq aptalyq 30 qazanǵa deıin bilim ordasynyń barlyq kampýstarynda apta boıy jalǵasyp jatty. Búgin ýnıversıtet bas ǵımaratynyń aldyna jınalǵan bilim alýshylar birneshe oqý korpýsy alańynda tazalyq jumystaryn júrgizip, aýlalardy aǵash japyraqtary men qoqystardan tazartty.
Aıta keteıik, Abaı ýnıversıtetinde «Taza Qazaqstan» aksıasyn qoldaý baǵytynda ótkiziletin senbilikter men is-sharalar munymen tolastamaıdy. Ekologıalyq mádenıetti qalyptastyrýǵa baǵyttalǵan jumystar jyl boıy jalǵasyn tappaq.
«Abai University» medıa ortalyǵy
